"მოვუწოდებ საქართველოს მთავრობას, მოიწვიოს უსაფრთხოების საბჭო... დროებით ჩაიკეტოს საზღვრები რუსეთთან. საფრთხე რეალურია!" - გიორგი გახარია
პარტია "საქართველოსთვის" ლიდერი გიორგი გახარია საქართველოს მთავრობას მოუწოდებს, რუსეთში მიმდინარე მოვლენების გამო მოიწვიოს უსაფრთხოების საბჭო და დაიცვას ქვეყნის ინტერესები.
აღნიშნულთან დაკავშირებით გახარია სოციალურ ქსელში მიმართვას ავრცელებს:
"მოვუწოდებ საქართველოს მთავრობას, მოიწვიოს უსაფრთხოების საბჭო და დაიცვას ქვეყნის ინტერესები! არაპროგნოზირებადი ვითარების გათვალისწინებით და სახელმწიფოს უსაფრთხოების დაცვის მიზნით, დროებით ჩაიკეტოს საზღვრები რუსეთთან. საფრთხე რეალურია!
საქართველოს სახელმწიფო საზღვარი - ლარსის სასაზღვრო-გამშვები პუნქტი ყველაზე ახლო წერტილია გამწვავების ზონასთან. მშვიდობის შენარჩუნებისთვის დროულად მოქმედებაა საჭირო" - ნათქვამია განცხადებაში.
- ცნობისთვის, წუხელ კერძო სამხედრო კომპანია "ვაგნერის" დამფუძნებელმა, ევგენი პრიგოჟინმა რუსეთის თავდაცვის სამინისტრო მისი სამხედრო ქვედანაყოფის ბანაკებზე სარაკეტო თავდასხმაში დაადაანაშაულა, რასაც წუხელ რიგი პროცესები მოჰყვა რუსეთში.
პრიგოჟინმა შურისძიება დააანონსა, რის შემდეგაც მოსკოვში ყველა მნიშვნელოვანი ობიექტები, სახელმწიფო დაწესებულებები და სატრანსპორტო ინფრასტრუქტურა გაძლიერებულ დაცვის კონტროლზე გადავიდა. ქუჩებში გამოვიდნენ "ომონისა" და "სობრის" სპეცდანიშნულების რაზმები. ასევე "ვაგნერის” ლიდერის ევგენი პრიგოჟინის განცხადებების შემდეგ, ჯავშანტექნიკა გამოჩნდა როსტოვის ქუჩებში და ადგილზე გეგმა “ციხესიმაგრე” გამოცხადდა.
ცოტა ხნის წინ ცნობილი გახდა, რომ "ვაგნერი" როსტოვში შევიდა და სამხედრო და ადმინისტრაციული შენობების ნაწილი დაიკავა. ქალაქისა და რაიონის მნიშვნელოვანი ნაწილი მის კონტროლქვეშაა. ასევე პრიგოჟნის ინფორმაციით, მათი კონტროლის ქვეშაა ვორონეჟიც. ორივე ოლქში განსაკუთრებული მობილიზებაა.
- "პრიგოჟინმა როსტოვზე კონტროლი დაამყარა, ჯერი ვორონეჟზეა" - პუტინის ძველი მეგობარი მოსკოვს უახლოვდება: რა სცენარით შეიძლება განვითარდეს მოვლენები?
- "90-იანების შემდეგ პირველად გავიგონე ტანკების გუგუნი მოსკოვის ქუჩებში... ვიღას ახსოვს უკრაინა" - რუსეთი პანიკამ მოიცვა: რას ამბობენ ადგილობრივები?