"ქუთაისის საერთაშორისო აეროპორტი მუშაობას დროებით წყვეტს" - რა განცხადებას ავრცელებს აეროპორტის ადმინისტრაცია
"ქუთაისის საერთაშორისო აეროპორტი დროებით მუშაობას წყვეტს" - ამის შესახებ განცხადება გამოქვეყნებულია "ფეისბუქზე" ქუთაისის აეროპორტტის ოფიციალურ გვერდზე.
"ქუთაისის საერთაშორისო აეროპორტი დროებით მუშაობას წყვეტს, წინასწარი ინფორმაციით, 11 ივლისის 07.00 სთ-მდე. აეროპორტის მუშაობის შეფერხების მიზეზი დასავლეთ საქართველოში უამინდობა, ძლიერი წვიმაა.
უხვი ნალექის გამო შეფერხდა აეროპორტის სამგზავრო ტერმინალის მუშაობა. ამ ეტაპზე მიღებულია უსაფრთხოების ყველანაირი ზომები, ქუთაისის საერთაშორისო აეროპორტში დაგეგმილი ფრენები თბილისის საერთაშორისო აეროპორტშია გადამისამართებული.
ამასთან, გამოცხადებულია ე.წ. ნოტამი, რაც გულისხმობს საერთაშორისო საავიაციო არხების საშუალებით შესაბამისი ინფორმაციის გავრცელებას. აეროპორტის ტერიტორიაზე აქტიურად მუშაობს ექსპერტთა ჯგუფი - ადგილზე სწავლობს არსებულ ვითარებას. საქართველოს აეროპორტების გაერთიანება სრულადაა პროცესში ჩართული და ოპერატიულად მოახდენს მოსახლეობის ინფორმირებას", - ნათქვამია განცხადებაში.
ცნობისთვის ძლიერმა წვიმამ ქუთაისის აეროპორტში პრობლემები შექმნა. დაიტბორა აეროპორტი და წვიმის შედეგად ჭერის ნაწილი დაზიანდა.
არსებული ინფორმაციით, შემთხვევის შედეგად არავინ დაშავებულა. უამინდობის გამო გადაიდო ფრენები, მათ შორის ქუთაისი-მოსკოვის რეისი.