"მაშინ რატომ არ ხართ ახლა იქ? საქართველოს სახელმწიფო მეთაური ახლა NATO-ს სამიტზე უნდა იყოს" - იან კელი ზურაბიშვილს
დღეს, ლიეტუვის დედაქალაქ ვილნიუსში ნატო-ს სამიტი გაიმართა. ის ალიანსის გენერალურმა მდივანმა, იენს სტოლტენბერგმა და ლიეტუვის პრეზიდენტმა, გიტანას ნაუსედამ გახსნეს.
საქართველოს პრეზიდენტი სალომე ზურაბიშვილი სამიტს Facebook-ის საკუთარ გვერდზე გამოეხმაურა.
"ასეთ მნიშვნელოვან დროს დაწყებულ ნატოს სამიტს ვილნიუსში წარმატებულ და პროდუქტიულ მუშაობას ვუსურვებ. საქართველო ერთგულად განაგრძობს ევროატლანტიკური ინტეგრაციის გზას!" - წერს სალომე ზურაბიშვილი.
აშშ-ის ყოფილმა ელჩმა საქართველოში, იან კელიმ სალომე ზურაბიშვილი აღნიშნული განცხადების გამო გააკრიტიკა და "ტვიტერზე" დაწერა:
"მაშინ რატომ არ ხართ ახლა იქ? საქართველოს სახელმწიფო მეთაური ახლა NATO-ს სამიტზე უნდა იყოს და Twitter-ზე კეთილი სურვილებით არ უნდა შემოიფარგლებოდეს" - წერს იგი სოციალურ ქსელში.