"იყო ცენზურა. დაიწყო ჩვენი საჯარო პოსტების კონტროლი..." - შსს-ს თანაშრომელი "დამამცირებელ და შეურაცხმყოფელ მოპყრობაზე" საუბრობს - როგორია მინისტრის მოადგილის პასუხი

შსს-ს ადამიანის უფლებათა დეპარტამენტის თანამშრომელმა, გოგა რაზმაძემ სოციალურ ქსელში განცხადება გაავრცელა და ხელმძღვანელობის მხრიდან მასზე განხორციელებულ დამამცირებელ მოპყრობაზე ისაუბრა.

• რაზმაძე წერს, რომ ადამიანის უფლებათა დეპარტამენტში არსებულ პრობლემებზე საუბრის გამო, გენერალურ ინსპექციაში დაიბარეს და "საქმე გაურჩიეს". განცხადების თანახმად, მან უკვე მიმართა სახალხო დამცველს, ასევე მიმართავს საერთაშორისო თუ ადგილობრივ ორგანიზაციიებს, უცხო ქვეყნის ელჩებსა და მედიას.

ამბობს, რომ მას შემდეგ, რაც დეპარტამენტის კურატორად მინისტრის მოადგილე, ალექსანდრე დარახველიძე დაინიშნა, დეპარტამენტისა და მისი თანამშრომლების მიმართ დამოკიდებულება შეიცვალა.

• გოგა რაზმაძე:

მას შემდეგ, რაც შინაგან საქმეთა სამინისტროში გავიარე ყველა ეტაპი და არაერთი მცდელობის მიუხედავად, სამართალი ვერ ვიპოვე, გადავწყვიტე საჯაროდ ვისაუბრო სამინისტროში არსებულ პრობლემებსა და ჩემს მიმართ გამოვლენილ ღირსების შემლახველ დამოკიდებულებაზე. მიმაჩნია, რომ, მოცემულ სიტუაციაში, საჯაროობა არის თავის დაცვის ერთადერთი შესაძლებლობა და დეპარტამენტის გადარჩენის ერთადერთი შანსი.მინდა მოგიყვეთ, თუ როგორი დამამცირებელი და ღირსების შემლახველი მოპყრობა ხორციელდება ჩემს მიმართ იმ უწყებაში, სადაც 12 წელია ღირსეულად ვმუშაობ.

20 წლის ასაკში გავხდი პოლიციელი და ამ პერიოდიდან მოყოლებული, ვცდილობდი მემუშავა კანონის უზენაესობისა და ადამიანის უფლებების დაცვის იდეით.2018 წელს, მას შემდეგ, რაც შსს-ში შეიქმნა ადამიანის უფლებათა დაცვის დეპარტამენტი, კონკურსის წესით, ყველა ეტაპის წარმატებით გავლის შემდეგ, ამავე დეპარტამენტში დავინიშნე განსაკუთრებით მნიშვნელოვან საქმეთა ინსპექტორად. დეპარტამენტში თავი მოვიყარეთ ადამიანებმა, ვისაც გვქონდა რწმენა და სურვილი გვემუშავა ადამიანის უფლებების დასაცავად. სწორედ წარმატებული საქმიანობის გათვალისწინებით, ერთი წლის შემდეგ დეპარტამენტის მანდატი გაფართოვდა. ჩემი საქმიანობის დადებითად შეფასების საფუძველზე, დავინიშნე ამავე დეპარტამენტის რეგიონული სამმართველოს უფროსად.ვმუშაობდი დეპარტამენტში, სადაც თანამშრომლებს სამსახურში მოსვლა გვიხაროდა, რადგან ვმუშაობდით რეალურად და დიდი სულისკვეთებით ადამიანების დასახმარებლად.

დეპარტამენტის კურატორად მინისტრის მოადგილე, ალექსანდრე დარახველიძის დანიშვნის შემდეგ, შეიცვალა დეპარტამენტისა და მისი თანამშრომლების მიმართ დამოკიდებულება. დეპარტამენტი აღარ მოიაზრებოდა ერთ-ერთ მნიშვნელოვან სტრუქტურულ ერთეულად. დეპარტამენტს აღარ ჰქონდა მონიტორინგის განხორციელების რეალური ბერკეტები. შესუსტდა კომუნიკაცია გარე აქტორებთანაც. ასევე, თანამშრომლები დავექვემდებარეთ ცენზურას. დაიწყო ჩვენი, მათ შორის, ჩემი საჯარო პოსტების კონტროლი და Facebook-ზე ადამიანის უფლებების დარღვევის ფაქტებთან დაკავშირებით დადებული პოსტების აღების მოთხოვნა, რომელიც სრულად ჯდებოდა საჯარო მოხელის ეტიკეტსა და გამოხატვის თავისუფლების ფარგლებში. უფრო მეტიც, ამ დეპარტამენტის დანიშნულება სწორედ ადამიანების უფლებების დარღვევის ფაქტების შემჩნევა და მათზე რეაგირება იყო.მე მქონდა რეაქცია ამ უკუსვლებზე და ვაფიქსირებდი ჩემს მოსაზრებებს დეპარტამენტის მოდგილეებთან, უფროსთან, მინისტრის მოადგილესთანაც. ამის გამო, მე დავექვემდებარე დისკრიმინაციას ჩემს მიერ გამოხატული განსხვავებული მოსაზრებების გამო - აღარ მრთავდნენ დეპარტამენტის საქმიანობაში (შეხვედრებში, ტრენინგებში, თათბირებში და ა.შ.). ჩამომაშორეს ყველა პროცესს.

მიუხედავად ამისა, ვცდილობდი მეკეთებინა ჩემი საქმე, იმ შესაძლებლობის ფარგლებში, რის საშუალებასაც იძლეოდა არსებული ვითარება.აღნიშნული მოვლენების ფონზე, დეპარტამენტში დაიწყო აუდიტის ჩატარება. აღნიშნული პროცესი დაიგეგმა სპონტანურად - 2023 წლის აუდიტის სამოქმედო გეგმით დეპარტამენტის შემოწმება საერთოდ არ იყო გათვალისწინებული. დეპარტამენტში არსებული ვითარების მხედველობაში მიღებით, ეჭვგარეშეა რომ აღნიშნული აუდიტის მიზანია რეორგანიზაცია, რომელსაც შედეგად მოჰყვება დეპარტამენტიდან ხელმძღვანელებისთვის „არასასურველი“ თანამშრომლების გაშვება და დეპარტამენტის ფუნქციების კიდევ უფრო შესუსტება.დეპარტამენტში მიმდინარე მოვლენებისა და დაგეგმილი აუდიტის შესახებ, არაერთხელ მქონდა მცდელობა ჩემთვის მოესმინა მინისტრის მოადგილეს, თუმცა ჩემთვის დრო ვერც ერთხელ გამონახა.ამიტომ, ჩემი მოსაზრებები იმეილის მეშვეობით გავუგზავნე მინისტრის მოადგილესა და დეპარტამენტის მენეჯმენტს.

16 ივნისს იმეილით გაგზავნილ წერილთან დაკავშირებით, რომელშიც მქონდა დაფიქსირებული ჩემი წუხილები დეპარტამენტში მიმდინარე მოვლენებეზე, 11 ივლისს დამიბარეს შსს-ს გენერალურ ინსპექციაში.მზად ვიყავი ახსნა-განმარტების მისაცემად (იმ პირობით, რომ ოქმის ასლს გადმომცემდნენ), თუმცა მოულოდნელად ოთახში შემოვიდა შსს-ს გენერალური ინსპექციის უფროსის მოადგილე, დავით მინდიაშვილი. მან გააგრძელა ჩემთან გასაუბრება, რაც 3 საათზე მეტ ხანს გაგრძელდა. მან საქმე გამირჩია იმის გამო, რომ ხელმძღვანელებისთვის მიწერილ წერილში დავაფიქსირე ჩემი მოსაზრებები დეპარტამენტში არსებულ ხარვეზებთან დაკავშირებით. მთელი გასაუბრების განმავლობაში, იგი მეპყრობოდა დამამცირებლად და შეურაცხყოფდა ჩემს ღირსებას. აგდებულად მოიხსენიებდა იმ დეპარტამენტს, სადაც ვმუშაობ. მეძახდა ამბიციურს. მეუბნებოდა, თუ რა მიკეთებია ცხოვრებაში. ფსიქოლოგიური ზეწოლის გზით მაიძულებდა ახსნა-განმარტების დაწერას. რამდენიმე თანამშრომელთან ერთად განიხილავდა ჩემს პირად Facebook პოსტებს და აკრიტიკებდა მათ. მიუხედავად იმისა, რომ ვთხოვე სხვა დროისთვის გადაგვეტანა ახსნა-განმარტების მიცემა (რაც ნებაყოფლობითია), იგი არ მიშვებდა ოთახიდან და მეუბნებოდა, რომ თუ არ დავწერდი განმარტებას, „სამსახურიდან გამაგდებდა.“ ეს პროცესი ჩემთვის ძალიან მძიმე იყო.

ეს ფორმატი არ მაძლევს შესაძლებლობას, რომ უფრო დეტალურად ვისაუბრო ჩემს მიმართ გამოვლენილ უსამართლო, დისკრიმინაციულ და ღირსების შემალახველ დამოკიდებულებაზე, რაც მხოლოდ იმიტომ "დავიმსახურე”, რომ დავინახე ხარვეზები ამ დეპარტამენტის საქმიანობაში, ვისაუბრე ამ ხარვეზებზე და მინდოდა ამ დეპარტამენტის განვითარება.ყველაფრის მიუხედავად, ჩემი ნებით არ მივდივარ სამსახურიდან. ალბათ, ისედაც გამიშვებენ. ჩემი მენტალური ჯანმრთელობის ფასად კვლავ ვაგრძელებ ბრძოლას სამართლიანობისა და ჩემი უფლებების დასაცავად.საჯაროდ მივმართავ სპეციალურ საგამოძიებო სამსახურს ოპერატიული რეაგირებისა და გამოძიების დაწყების მოთხოვნით. მზად ვარ, დეტალური ინფორმაცია მივაწოდო ჩემს მიმართ 11 ივლისს განხორციელებული დამამცირებელი მოპყრობის შესახებ.ასევე, უკვე მივმართე სახალხო დამცველს, ჩემს მიმართ სამინისტროში დისკრიმინაციულ მოპყრობასთან დაკავშირებით.ასევე, მივმართავ ყველა საერთაშორისო თუ ადგილობრივ ორგანიზაციას, უცხო ქვეყნის ელჩებს, მედიას - დაინტერესდნენ აღნიშნული ფაქტით და არ დაუშვან ჩემი და ჩემი ოჯახისწევრების უსაფრთხოების ხელყოფა.

• გოგა რაზმაძის განცხადებას ტყუილსა და აბსურდს უწოდებს შინაგან საქმეთა მინისტრის მოადგილე, ალექსანდრე დარახველიძე.

დარახველიძის განმარტებით, ადამიანის უფლებათა დეპარტამენტში, რომელიც 5 წელია სამინისტროს სისტემაში ფუნქციონირებს, აუდიტი ტარდება, გოგა რაზმაძე კი აღმოჩნდა ერთადერთი თანამშრომელი, რომელსაც ამ პროცესმა დისკომფორტი შეუქმნა.

"მინდა საზოგადოებას ვუთხრა, რომ ადამიანის უფლებების დეპარტამენტი 5 წელია, რაც შეიქმნა შინაგან საქმეთა სამინისტროს სისტემაში და ჩვენ მივიღეთ არაერთი რეკომენდაცია საერთაშორისო ორგანიზაციებისგან, როგორიც არის გაერო, ევროკავშირი და ა.შ. რომ ჩვენ უნდა ვიმუშაოთ ამ დეპარტამენტის გაძლიერების მიმართულებით. იმისთვის, რომ შეგვეფასებინა არსებული მდგომარეობა, სად არის ძლიერი და სუსტი მხარეები, ვთხოვეთ აუდიტის დეპარტამენტს, შეესწავლა ფუნქციური დატვირთვა, ეფექტიანობა ამ დეპარტამენტის და სწორედ ამის შემდეგ დაგვეგეგმა შემდეგი ნაბიჯები. ამის შესახებ მე პირადად დეპარტამენტის ყველა თანამშრომელს ვესაუბრე, მათ შორის, აუდიტის დეპარტამენტის თანამშრომლები შეხვდნენ მენეჯმენტს და აუხსნეს მეთოდოლოგია და ის ძირითადი საკითხები, თუ როგორ ჩატარდებოდა აუდიტი. მხოლოდ გოგა რაზმაძე აღმოჩნდა ერთადერთი ადამიანი, რომელსაც ეს პროცესი დისკომფორტს უქმნის და ცოტა გაუგებარია ჩემთვის, თუ მუშაობ, თუ ყველაფერს კარგად აკეთებ, რა პრობლემაა, რომ ეს ყველაფერი კვალიფიციურმა, საერთაშორისო სტანდარტების შესაბამისად მომუშავე დეპარტამენტმა შეაფასოს და პირიქით, გამოჩნდეს, ვინ აკეთებს საქმეს, სად არის პრობლემა, სად არის გამოსავალი.

სამწუხაროდ, მე ვერ ამოვიკითხე რაში გამოიხატა პრობლემები. დეპარტამენტი ჩვეულ რეჟიმში მუშაობს, ყველა თანამშრომელი აგრძელებს იმ საქმეების მონიტორინგს, რაც მათ დებულებით ევალებათ. ყველა შეხვედრაში მონაწილეობს თითოეული თანამშრომელი, სადაც კი ამ დეპარტამენტის მანდატია და არანაირი კონკრეტული ფაქტი იმის შესახებ, რომ რამე ზეწოლას ან შევიწროებას ჰქონდა ადგილი, გარდა გოგა რაზმაძის ზოგადი განცხადებებისა, ჩვენ არ მოგვისმენია. როგორც მე ამოვიკითხე მის პოსტში, მას მიუმართავს სახალხო დამცველისთვის და დაველოდოთ შესწავლის შედეგებს“,- განაცხადა მინისტრის მოადგილემ.

კითხვაზე, სთხოვდნენ თუ არა რაზმაძეს სოციალურ ქსელში დაწერილი იმ პოსტების წაშლას, რომელიც უწყების ინტერესებში არ შედიოდა, დარახველიძემ აღნიშნა, რომ მსგავსი მოთხოვნა არ ყოფილა. მან ასევე განმარტა, რომ თანამშრომლებს ზოგადად სთხოვენ ეთიკის დაცვით მოქმედებას.

"ზოგადად, შინაგან საქმეთა სამინისტროში არის ეთიკა და ეთიკის კოდექსი და იმ საქმეებზე, რაზეც თითოეული ჩვენგანი ვმუშაობთ, წინასწარ გამოხატული პოზიციის დაფიქსირება არ არის ეთიკური საქციელი. ჩვენ არავისთვის მიგვითითებია რაიმე პოსტის აღება, ყველას მოვუწოდებთ, რომ ეთიკის კოდექსის შესაბამისად იმოქმედონ.

ამასთან, ბატონმა გოგა რაზმაძემ 6-გვერდიანი მეილი მომწერა მე, მის ხელმძღვანელებს, სადაც ის აღნიშნავდა, რომ მის წინააღმდეგ ხორციელდებოდა ზეწოლა, კონკრეტულ სამართალდარღვევას უთითებდა, ბუნებრივია, ჩვენ ვალდებული ვიყავით, რომ ეს ინფორმაცია მიგვეწოდებინა გენერალური ინსპექციისთვის და გენერალური ინსპექცია თუ მას სთხოვს მტკიცებულებებს და არგუმენტებს თავისი განცხადების დასადასტურებლად, აქ მე რაიმე შეურაცხმყოფელს ან დამამცირებელს ვერ ვხედავ“, - განაცხადა დარახველიძემ.

• საკითხთან დაკავშირებით კომენტარი გააკეთა სახალხო დამცველმა, ლევან იოსელიანმაც. მისი თქმით, სახალხო დამცველის აპარატმა გოგა რაზმაძის საქმეზე მოკვლევა ერთი კვირის წინ დაიწყო.

"საკითხი, რომელიც უკავშირდება ბატონ რაზმაძეს, ჩვენთვის აქამდეც იყო ცნობილი. მან მომართა სახალხო დამცველის ოფისს, პირადადაც მომმართა და ჩვენ კვირაზე მეტია დაწყებული გვაქვს ამ საქმის შესწავლა. შესაბამისი დეპარტამენტი მოიკვლევს ამ საკითხს და ამის შემდეგ საზოგადოებისთვის ცნობილი გახდება, რა პოზიცია ექნება სახალხო დამცველს მის განცხადებასთან დაკავშირებით.

ერთ კვირაში ვერაფერი გამოვლინდება, იმიტომ რომ საქმის შესწავლას აქვს თავისი პროცედურა. ამას რაღაცა დრო დასჭირდება,“ - განაცხადა იოსელიანმა.