პოლონეთში საქართველოს მოქალაქე არასრულწლოვნების სექსუალური შევიწროვების ბრალდებით დააკავეს - რა მოხდა ბიტომის აუზზე და რას წერს პოლონური მედია
პოლონეთში, ქალაქ ბიტომის სასამართლოში, დღეს, 17 ივლისს ბრალს წარუდგენენ საქართველოს 48 წლის მოქალაქეს. მას ბრალად ედება სამი არასრულწლოვნის მიმართ სხვა სახის სექსუალური ქმედებების ჩადენა და ჩადენის მცდელობა. ბრალის დამტკიცების შემთხვევაში კი, 12-წლიანი პატიმრობა ემუქრება.
- ინციდენტი გასულ შაბათს, 15 ივლისს ბიტომის საცურაო აუზზე მოხდა. აუზის დაცვის თანამშრომლებს აუზით მოსარგებლე ერთ-ერთი არასრულწლოვანი გოგონას დედამ შეატყობინა, რომ მამაკაცი მის შვილს ავიწროებდა. ამის შემდეგ აუზზე მყოფმა კიდევ ორმა არასრულწლოვანმა ბიჭმა უამბო დაცვას, რომ მამაკაცი მათაც ავიწროებდა. პოლონური მედიის ცნობით, სამივე მოზარდი 15 წლამდე ასაკისაა.
აუზის დაცვამ მამაკაცი და მისი თანმხლები სამი პირი დააკავა და პოლიცია გამოიძახა. ყველა მათგანი საქართველოს მოქალაქეა. პოლიციის გამოძახებამდე ადგილობრივი მოსახლეობა შეიკრიბა. ისინი მამაკაცის ლინჩის წესით გასამართლებას ითხოვდნენ. აქციის დასაშლელად სამართალდამცველებს ცრემლსადენი გაზის გამოყენება დასჭირდათ.
- "საქმეზე შეგროვებული მტკიცებულებების გაანალიზების შემდეგ, დაკავებულია საქართველოს 48 წლის მოქალაქე. მას ბრალად ედება 15 წლამდე ასაკის, სულ სამი არასრულწლოვნის მიმართ, სხვა სექსუალური ქმედებების ჩადენა და ჩადენის მცდელობა“, - ნათქვამია პოლონეთის შსს-ს განცხადებაში.
როგორც ადგილობრივი მედია წერს, ეჭვმიტანილი ქალაქ ბიტომში რამდენიმე დღეა, რაც ლეგალურად ცხოვრობს. გამოძიების ინფორმაციით, მან არ აღიარა ბრალდება და მისცა ახსნა-განმარტება, რომლის შინაარსსაც გამომძიებლები არ ასაჯაროებენ.
აღსანიშნავია, რომ ამ საქმეზე ბრალი მხოლოდ ერთ პირს წარუდგინეს. დანარჩენი დაკავებული სამი პირი (სამივე საქართველოს მოქალაქე) მოწმის სახით დაკითხეს და გაათავისუფლეს.
სამართალდამცველთა განცხადებით, მათ არანაირი შემხებლობა არ ჰქონიათ მომხდართან და არ არსებობდა მათთვის ბრალის წარდგენის საფუძველი.