ბრიუსელში კოორდინირებული ტერაქტების მოწყობაში 6 მამაკაცი დამნაშავედ ცნეს - მაშინ თავდასხმებს ათობით ადამიანი ემსხვერპლა

2016 წლის ბრიუსელის ტერაქტში მონაწილეობის გამო, ბრიუსელის სასამართლომ ექვსი მამაკაცი დამნაშავედ ცნო. სასამართლომ გადაწყვეტილება ხანგრძლივი პროცესისა და ნაფიც მსაჯულთა 19-დღიანი მსჯელობის შემდეგ გამოაცხადა. ეს ყველაზე დიდი ნაფიც მსაჯულთა სასამართლო პროცესია ბელგიის ისტორიაში.

• ბრალდებულებს შორის არის 33 წლის სალაჰ აბდესლამი, რომელიც შარშან საფრანგეთში დამნაშავედ ცნეს 2015 წლის ნოემბერში პარიზში მომხდარ თავდასხმებში მონაწილეობაშიც, რომლის დროსაც 130 ადამიანი დაიღუპა.

სასამართლომ დაუსწრებლად გაასამართლა უსამა ატარი, რომელიც, სავარაუდოდ, პარიზის თავდასხმების დაგეგმვაში სირიიდან მონაწილეობდა. ვრცელდება ინფორმაცია, რომ ის სირიაში გარდაიცვალა.

ბრალდებულების სასჯელს მოგვიანებით, სავარაუდოდ, სექტემბერში გამოაცხადებენ.

შეგახსენებთ, რომ 2016 წლის 22 მარტს, ბრიუსელში ორი კოორდინირებული ტერორისტული აქტი განხორციელდა. ორმა თვითმკვლელმა ტერორისტმა ბრიუსელის აეროპორტში ბომბი ააფეთქა.

ერთი საათის შემდეგ კი აფეთქება მოხდა მეტროშიც. დაიღუპა 32 ადამიანი და დაშავდა 300-ზე მეტი - მეორე მსოფლიო ომის შემდეგ, ეს ბელგიაზე ყველაზე სისხლისმღვრელი თავდასხმა იყო. მთავრობამ 3-დღიანი გლოვა გამოაცხადა. თავდასხმებზე პასუხისმგებლობა ისლამურმა სახელმწიფომ აიღო.