"ილოცონ, რომ ჩვენთან გვყავს "ვაგნერელები“, წინააღმდეგ შემთხვევაში გააღწევდნენ და ძლიერად დაარტყამდნენ ჟეშუვსა და ვარშავას. ამიტომ მადლობა გვითხრან" - ლუკაშენკო
ბელარუსის პრეზიდენტის ალექსანდრე ლუკაშენკოს განცხადებით, მან “იხუმრა” პოლონეთზე “ვაგნერის” დაჯგუფების თავდასხმის გეგმებთან დაკავშირებით. ინფორმაციას ბელარუსული სახელმწიფო გამოცემა “ბელტა” ავრცელებს.
“ვიხუმრე, რომ “ვაგნერელები” ერთმანეთში ჩურჩულებენ: ჟეშუვში ექსკურსიაზე წავიდეთო. რატომ? იმიტომ რომ ტექნიკა და შეიარაღება ჟეშუვიდან მიდიოდა იქ, ბახმუტთან, სადაც ეს “ვაგნერელები” იბრძოდნენ. ათასობით ეს ბიჭი მოკვდა იქ და ამას არ აპატიებენ”, - განაცხადა ლუკაშენკომ.
მისი თქმით, პოლონეთის მთავრობამ მას მადლობა უნდა უთხრას იმისთვის, რომ “ეს მებრძოლები ჩვენთან დავპატიჟეთ.”
მან არ დააკონკრეტა “ვაგნერის” დაჯგუფების რამდენი მებრძოლი იმყოფება ბელარუსის ტერიტორიაზე, მაგრამ მისი თქმით, მთლიანობაში “ვაგნერში” 30 000 მებრძოლი ირიცხება.
“ილოცონ, რომ ჩვენთან გვყავს ისინი, კიდევ როგორღაც უზრუნველვყოფთ. წინააღმდეგ შემთხვევაში, ჩვენს გარეშე ისინი იქ გააღწევდნენ და ძლიერად დაარტყამდნენ ჟეშუვსა და ვარშავას. ამიტომ ჩემს მიმართ საყვედურები არაა საჭირო, მადლობა მითხრან” - განაცხადა ლუკაშენკომ.