"მეუღლე და სამი მცირეწლოვანი შვილი მყავს იქ ჩარჩენილი, არ ვიცი, როგორ არიან... ხალხო, რამე ქენით, გთხოვთ! გამოგზავნეთ ვერტმფრენი, რათა ვიპოვოთ" - მეწყერში მოყოლილი პირების ოჯახის წევრი
შოვში, ზვავში მოყოლილი ადამაინების ოჯახის წევრები დახმარებას ითხოვენ. ერთ-ერთი მოქალაქის განცხადებით, მეწყერმა მისი მეუღლე და სამი მცირეწლოვანი შვილი მოიყოლა.
"მეუღლე და სამი მცირეწლოვანი შვილი მყავს ჩარჩენილი. არ ვიცი როგორ არიან. როგორც ვიცი, ორი ვერტმფრენი ჰყავთ, ღამის ხედვით. ანუ არ გვინდა ეს სამი მცირეწლოვანი ბავშვი?! დაიღუპონ? ხალხო, რამე ქენით, ძალიან გთხოვთ. გამოგზავნეთ ვერტმფრენი, რომ ვიპოვოთ. დღის 12 საათის მერე აღარ გამოსულან კონტაქტზე" - აცხადებს მეწყერში მოყოლილი ადამაინების ოჯახის წევრი "მთავარ არხთან".
- შსს-ის უახლესი ინფორმაციით, ამ დროისთვის მიმდინარეობს გარდაცვლილების ამოყვანა, სამაშველო ღონისძიება მთელი ღამის განმავლობაში, უწყვეტ რეჟიმში გაგრძელდება.
“შინაგან საქმეთა სამინისტროს საგანგებო სიტუაციების მართვის სამსახურის თანამშრომლების მიერ ონის მუნიციპალიტეტში მიმდინარე სამაშველო ღონისძიების შედეგად, ორი პირის ცხედარია ნაპოვნი.
ამ დროისთვის, მიმდინარეობს გარდაცვლილების ამოყვანა.
სამაშველო ღონისძიებაში ჩართულია 400-მდე მეხანძრე- მაშველი და შინაგან საქმეთა სამინისტროს შესაბამისი დანაყოფების წარმომადგენლები.
სტიქიის ადგილას იმყოფებიან შინაგან საქმეთა მინისტრის მოადგილეები, იოსებ ჭელიძე, გიორგი ბუთხუზი და საგანგებო სიტუაციების მართვის სამსახურის უფროსი, თეიმურაზ მღებრიშვილი.
ამ ეტაპზე, სტიქიის ზონაში მყოფი 70-მდე მოქალაქე უსაფრთხო ტერიტორიაზეა გადაყვანილი.
სამაშველო ღონისძიება მთელი ღამის განმავლობაში, უწყვეტ რეჟიმში გაგრძელდება“, - ნათქვამია ინფორმაციაში.
ასევე იხილეთ:
- "სტიქიაში მოყვა მთელი ჩემი ოჯახი... სასწრაფოდ გამომიყავით ვერტმფრენი, მე გავყვები ბიჭებს და მოვაძებნინებ" - მეწყერში მოყოლილი ადამიანების ახლობლები დახმარებას ითხოვენ
- "როგორღაც გადავრჩით! ორჯერ წაგვიღო მეწყერმა მე და ჩემი დისშვილი... ღმერთმა გადაგვარჩინა" - რას ჰყვება დავით ჯალაძე, რომელმაც თავისი 5 წლის დისშვილი მიწის მასიდან ამოიყვანა