უახლესი ფოტოები, რომელსაც გზების დეპარტამენტი ავრცელებს - როგორ გამოიყურება შოვი სტიქიის შემდეგ?
შოვში, სტიქიის ზონაში ინტენსიურ რეჟიმში გრძელდება სტიქიის სალიკვიდაციო, გზის წმენდისა და აღდგენის სამუშაოები. აქტიურად მიმდინარეობს დროებითი ხიდის მოწყობისა და სხვა ხიდების აღდგენის სამუშაოები.
გაიწმინდა შესასვლელები და მიმდინარეობს დროებითი გზების მოწყობა, სტიქიის ზონასთან კომუნიკაციის აღსადგენად. სამუშაოები მიმდინარეობს უშუალოდ მდინარის კალაპოტშიც. ადგილზე მობილიზებულია 25 ერთეული ტექნიკა და დღის განმავლობაში კიდევ დაემატება მძიმე ტექნიკა.
გუშინ, შიდასახელმწიფოებრივი მნიშვნელობის ქუთაისი(ჭომა)-ალპანა-მამისონის უღელტეხილის საავტომობილო გზის 136-ე კმ-ზე არსებული დროებითი სარმის ხიდი და 139-კმ-ზე არსებული ხიდი (შოვი), მთაში მოსული ძლიერი წვიმის შედეგად ადიდებულმა მდ. ჭანჭახმა წაიღო, რის გამოც გზის აღნიშნულ მონაკვეთებზე აკრძალულია ყველა სახის ავტოტრანსპორტის მოძრაობა.
შოვში მეწყერი გუშინ ჩამოწვა. ბოლო ოფიციალური ინფორმაციით, შინაგან საქმეთა სამინისტროს საგანგებო სიტუაციების მართვის სამსახურის თანამშრომლების მიერ ონის მუნიციპალიტეტში მიმდინარე სამაშველო ღონისძიების შედეგად, 7 პირის ცხედარია ნაპოვნი.
ნახეთ ფოტოები, რომელსაც გზების დეპარტამენტი ავრცელებს:
