პორტუგალია ტყის ხანძრებს ებრძვის
პორტუგალია მაღალი ტემპერატურის ფონზე ათასობით ჰექტარზე გავრცელებული ტყის ხანძრების ჩაქრობას ცდილობს. ამ დროისთვის, ქვეყანაში სულ 19 სოფელია ევაკუირებული.
ორშაბათს ღამით, სამხრეთით მდებარე ქალაქ ოდემირასთან გაჩენილი ხანძრის გამო, 1400-ზე მეტი მოქალაქე იძულებული გახდა, საცხოვრებელი ადგილი დაეტოვებინა. ხელისუფლებამ ხანძრის სალიკვიდაციოდ ადგილზე 800-მდე მეხანძრე გაგზავნა, ქვეყნის ორ ზონაში კი 16 წყალმაქრი ვერტმფრენი მუშაობს. შედეგად, სამი ძირითადი ხანძარი, რომელმაც ასობით ჰექტარი გადაწვა, შაბათ-კვირას კონტროლის ქვეშ მოექცა.
ხელისუფლებამ ტყის ხანძრის მაქსიმალური რისკის ქვეშ, პორტუგალიის მასშტაბით, 120-ზე მეტი მუნიციპალიტეტი გამოაცხადა. პარალელურად, ექსპერტები მოსახლეობას აფრთხილებენ, რომ მომდევნო კვირაშიც შენარჩუნდება სიცხეები და ტემპერატურა 40 გრადუსს გადააჭარბებს.
- ქალაქ ოდემირას მერმა, ჰელდერ გერეირომ თქვა, რომ სიტუაცია "კრიტიკული, რთული და კომპლექსურია" .
ესპანეთის სახელმწიფო მეტეოროლოგიური სააგენტოს წარმომადგენელმა, რუბენ დელ კამპომ Reuters-ის სააგენტოს განუცხადა, რომ სიცხე ჩრდილოეთ აფრიკის ცხელი, მშრალი ჰაერის დიდი მასის გადაადგილებითაა გამოწვეული და აგვისტოში სიცხე კიდევ უფრო ინტენსიური და ხანგრძლივი იქნება, ვიდრე ეს ივლისში დაფიქსირდა.
წყარო: BBC
მოამზადა: ანა სიბოშვილმა