"არავის მოვუკითხივართ. არც ის ვიცი, დაკარგულ ადამიანთა რიცხვი რა პრინციპით ითვლებოდა..." - რას წერს ბიჭი, რომელიც ბუბას მთაზე სალაშქროდ მიდიოდა და ტრაგედიას გადაურჩა

ნიკა კაკაბაძე ერთ-ერთია, რომელიც შოვში 3 აგვისტოს მომხდარ ტრაგედიას გადაურჩა. თუმცა ახალგაზრდა კაცი, რომელიც მეგობრებთან ერთად სალაშქროდ მიდიოდა და საშვიც აღებული ჰქონდა, შემთხვევის ადგილამდეც ვერ მივიდა. ნიკა წერს, რომ შოვს რომ მიუახლოვდნენ, პროცესი უკვე 10 წუთის დაწყებული იყო. ტრაგედიიდან რამდენიმე დღე გავიდა, მაგრამ ის არავის მოუკითხავს, მიუხედავად იმისა, რომ ონში სასაზღვრო პოლიციამ მათი მონაცემები ჩაიწერა და იცოდნენ, ახალგაზრდები სად მიდიოდნენ.

ნიკა კაკაბაძე:

"სალაშქროდ მივდიოდოთ ბუბას მთაზე, ანუ იქ, საიდანაც დაიწყო მეწყერი. ონში საშვის აღების პროცესი გაიწელა, რაც საბედისწერო აღმოჩნდა. შოვში რომ შევდიოდით, პროცესი უკვე 10 წუთის დაწყებული იყო, მანქანები გამორბოდნენ და შეტრიალდით, შეტრიალდითო, გვიყვიროდნენ. ხალხი ტიროდა. გამოვბრუნდით და გლოლიდან უძირო ტბისკენ დავიძარით (ვინც იცოდა, რომ რაჭაში ვიყავით, ყველა გვთხოვდა, მაშინვე უკან წამოვსულიყავით, თუმცა უსაფრთხოების მიზნითაც კი ამ მთაზე ასვლა ყველაზე სწორი გადაწყვეტილება იყო. პირველ აღმართზე გვესმოდა ადიდებული მდინარის ხმა და ვხედავდით მასში მოქცეულ ხეებსა და სახლების კედლებს). ამ ამბავს მერე კიდევ დავუბრუნდები, მაგრამ ახლა მარტო ერთი რამის თქმა მინდა.

ონში, სასაზღვრო პოლიციის დეპარტამენტში ჩაიწერეს სამივეს მონაცემები. იცოდნენ, რომ ზუსტად იქ მივდიოდით, სადაც ტრაგედიის ეპიცენტრი იყო. ამ დღეების განმავლობაში, არავის მოვუკითხივართ. არც ის ვიცი, დაკარგულ ადამიანთა რიცხვი რა პრინციპით ითვლებოდა, რადგან თუკი ჩვენთან არ გადაამოწმეს, მაგ სიაში უნდა ვყოფილიყავით.

უძირო ტბიდან დაბრუნების შემდეგ თავად მივწერეთ, რომ უვნებლად ვიყავით და თბილისში დავბრუნდით. მივიღეთ პასუხი:

"უი, თქვენ ხომ აიღეთ შოვის საშვები და როგორ ხართ?” - წერს ახალგაზრდა "ფეისბუქის" პირად გვერდზე.