"ეს ყველაფერი ომს ჰგავს“ - მაჰაჩყალაში მომხდარი აფეთქების შედეგად დაღუპულთა რიცხვი 35-მდე გაიზარდა

დაღესტნის რესპუბლიკის დედაქალაქ მაჰაჩყალაში ბენზინგასამართ სადგურზე მომხდარი აფეთქების შედეგად დაღუპულთა რიცხვი 35-მდე გაიზარდა, მათ შორის სულ მცირე სამი ბავშვია - ინფორმაციას რუსეთის ჯანდაცვის სამინისტრო ავრცელებს.

ოფიციალური პირების ცნობით, დაშავებულია 100-ზე მეტი ადამიანი, მათგან 13 ბავშვი.

როგორც ადგილობრივი ხელისუფლება იტყობინება, თავდაპირველად ცეცხლი საავტომობილო მაღაზიაში გაჩნდა და შემდეგ ახლომდებარე ბენზინგასამართ სადგურზე გავრცელდა, რასაც აფეთქებები მოჰყვა.

“აფეთქების შემდეგ ყველაფერი კვამლმა დაფარა, ვეღარაფერს ვხედავდით“, - განუცხადა ერთ-ერთმა თვითმხილველმა BBC-ის.

"ეს ყველაფერი ომს ჰგავს“, - განაცხადა მეორემ.

დაღესტნის რესპუბლიკის ხელმძღვანელის, სერგეი მელიკოვის განცხადებით, 15 აგვისტო გლოვის დღედ გამოცხადდა.

შეგახსენებთ, რომ მაჰაჩყალაში ბენზინგასამართი სადგური 14 აგვისტოს, ადგილობრივი დროით 21:40 საათზე აფეთქდა. აფეთქების შედეგად ძლიერი ხანძარი გაჩნდა, რომლის ფართობმა 600 კვადრატულ მეტრს მიაღწია.