იდენტიფიცირებულია შოვში დაკარგული კიდევ ერთი ახალგაზრდის ცხედარი - კოტე მაისურაძე დედასთან და დასთან ერთად ემსხვერპლა სტიქიას
გავრცელებული ინფორმაციით, იდენტიფიცირებულია შოვში, სტიქიის ზონაში დაკარგული კიდევ ერთი ადამიანის ცხედარი. ეს კოტე მაისურაძეა. ამის შესახებ ინფორმაცია გაავრცელა მარიტა გუტაშვილმა, რომელიც სტიქიას თვითონ გადაურჩა, თუმცა დაკარგა ოჯახის 9 წევრი - და-ძმა, დეიდა 2 შვილით და ბიძაშვილი - ახალგაზრდა ქალი 3 მცირეწლოვანი ბავშვით. კოტე მაისურაძე სწორედ მარიტას დეიდაშვილია.
როგორც მარიტა გუტაშვილი სოციალურ ქსელში წერს, მის დეიდას - შორენა ბიჭაშვილს, შვილებთან - კოტესა და მარიამთან ერთად, 22 აგვისტოს, რუსთავში დაკრძალავენ.
სტიქიის ზონაში, ბოლო მონაცემებით, ნაპოვნია 27 ადამიანის ცხედარი, მათგან ორის იდენტიფიცირება ჯერ არ მომხდარა. საგანგებო სამსახურის თანამშრომლები და ჯარისკაცები 6 დაკარგულ ადამიანს ეძებენ.