ისტორიაში პირველად, მედიკოსებმა ადამიანის ტვინში 8-სანტიმეტრიანი ცოცხალი ჭია აღმოაჩინეს - "საოპერაციოში ყველამ შოკი მიიღო"

მსოფლიოში პირველად, ადამიანის ტვინში ცოცხალი, 8 სმ სიგრძის ჭია აღმოაჩინეს.

"ძაფისებური სტრუქტურის ობიექტი" ავსტრალიელი პაციენტი ქალის შუბლის ნაწილიდან გასულ წელს, ოპერაციის დროს ამოიყვანეს.

ექიმების თქმით, პაციენტს უჩვეულო სიმპტომები აწუხებდა - კუჭის ტკივილი, ხველა, ღამით ოფლიანობა, რაც შემდეგ მეხსიერების პრობლემებსა და დეპრესიაში გადაიზარდა. საბოლოო დასკვნის მიხედვით, ქალის სხეულში ჭიაყელა საკვებად გამოსადეგი ბალახეულის მიღების შემდეგ მოხვდა. სავარაუდოდ, წითელი შეფერილობის პარაზიტი პაციენტის თავის ქალაში ორ თვემდე ცხოვრობდა.

• მკვლევარები გვაფრთხილებენ, რომ შემთხვევა ცხოველებიდან ადამიანებზე დაავადებების და ინფექციების გადაცემის გაზრდილ საფრთხეს მოასწავებს.

"საოპერაციო ოთახში ყველამ შოკი მიიღო, როცა ქირურგმა პაციენტის თავის ქალიდან ცოცხალი, 8 სანტიმეტრის მოძრავი წითელი ჭია ამოიყვანა", - ყვება კანბერას საავადმყოფოს ინფექციურ დაავადებათა დოქტორი სანჯაია სენაიაკე. "ეს ისეთი შემთხვევაა, რომელიც აქამდე არასდროს ყოფილა დოკუმენტირებული", - დასძენს ის.

Ophidascaris robertsi-ის ჭია ე.წ. ხალიჩის პითონებშია გავრცელებული (არაშხამიანი გველები, რომლებიც ავსტრალიის დიდ ნაწილში გვხვდება). მეცნიერების ვარაუდით, ქალს ჭია მას შემდეგ ჩაუსახლდა, რაც მან თავის საცხოვრებელთან ისპანახი მოკრიფა და კერძში გამოიყენა.

პარაზიტოლოგიის ავსტრალიელმა ექსპერტმა, მეჰრაბ ჰოსეინმა ეჭვი გამოთქვა, რომ ქალი მას შემდეგ გახდა ჭიის მასპინძელი, რაც მან პითონის განავლით და პარაზიტის კვერცხებით დაბინძურებული მცენარე მიირთვა.

<iframe width="400" height="500" frameborder="0" src="https://www.bbc.com/news/av-embeds/66643241/vpid/p0g9cq20"></iframe>

პაციენტი სააავადმყოფოში 2021 წლის იანვრის ბოლოს გადაიყვანეს. მოგვიანებით, სკანირებამ თავის ტვინის მარჯვენა შუბლის არეში ატიპიური დაზიანება გამოავლინა. ქალის ავადმყოფობის მიზეზი კი მხოლოდ 2022 წელს, ქირურგიული ჩარევის შემდეგ დადგინდა.

ქალი ახლა გამოჯანმრთელების გზას ადგას. დოქტორმა სენანაიკემ, რომელიც ასევე ავსტრალიის ეროვნული უნივერსიტეტის (AEU) მედიცინის ასოცირებული პროფესორიცაა, BBC-ის განუცხადა, რომ ეს შემთხვევა გაფრთხილებაა. AEU იუწყება, რომ ბოლო 30 წლის განმავლობაში 30 ახალი ტიპის ინფექცია გამოჩნდა. მათგან სამი-მეოთხედი ზოონოზური ინფექციური დაავადებებია, რომლებიც ცხოველებიდან ადამიანებზე გადავიდა.

წყარო: bbc

მოამზადა: ანა სიბოშვილმა