"კიევს, გაზაფხულის შემდეგ, ასეთი ძლიერი თავდასხმა არ განუცდია" - რუსებმა იერიში მიიტანეს უკრაინის დედაქალაქზე: დაღუპულია ორი ადამიანი

რუსულმა ძალებმა დღეს დილით კიევზე სარაკეტო იერიში მიიტანეს. ბოლო ინფორმაციით, თავდასხმას მინიმუმ 2 ადამიანი ემსხვერპლა, - ამის შესახებ კიევის მერი, ვიტალი კლიჩკო "ტელეგრამზე" წერს.

მისი ინფორმაციით, უკრაინის საჰაერო თავდაცვის მიერ განადგურებული სამიზნეების ნამსხვრევები უკრაინის დედაქალაქში რამდენიმე შენობას მოხვდა.

კიევის მერის თქმით, ამ დროისთვის აღმოჩენილია ორი ადამიანის ცხედარი, დაშავებულია კიდევ ერთი მოქალაქე, 24 წლის გოგო.

• კიევის სამხედრო ადმინისტრაციის ხელმძღვანელის, სერგეი პოპკოს ცნობით, უკრაინის საჰაერო თავდაცვამ კიევის საჰაერო სივრცეში 20-ზე მეტი სამიზნე გაანადგურა.

"კიევს, გაზაფხულის შემდეგ, ასეთი ძლიერი თავდასხმა არ განუცდია. მტერმა განახორციელა მასიური, კომბინირებული შეტევა დრონებისა და რაკეტების გამოყენებით", - აცხადებს პოპკო.

მისი თქმით, რუსებმა თავდპირველად უპილოტო საფრენი აპარატები (წინასწარი მონაცემებით, Shahed-ის დრონები) გამოიყენეს, შემდეგ კი Ту-95мс ტიპის სტრატეგიული თვითმფრინავიდან რაკეტები გაუშვეს. "საჰაერო თავდაცვის ძალებითა და საშუალებებით მტრის 20-ზე მეტი სამიზნე განადგურდა", - აცხადებს სერგეი პოპკო.