რუსეთს უპილოტო საფრენ აპარატებთან ერთად, უკვე "ამოუცნობი მფრინავი ობიექტიც" უტევს - რა ხდებოდა ოკუპანტი ქვეყნის დედაქალაქსა და რიგ რაიონებში წუხელ?
უკრაინაში რუსეთის ფართომასშტაბიანი შეჭრიდან 555-ე დღეს, რუსული მედია ოკუპანტი ქვეყნის ტერიტორიაზე მორიგ თავდასხმებზე წერს. მოგეხსენებათ, ბოლო ხანს, რუსეთის ტერიტორიაზე თითქმის ყოველდღე ხდება უპილოტო საფრენი აპარატებით შეტევა. ოფიციალური კიევი ამ თავდასხმებთან კავშირს ოფიციალურად არც ადასტურებს და არც უარყოფს.
ფსკოვის მცხოვრებლები უკვე მეორე ღამეა იუწყებიან სროლებისა და აფეთქების ხმების თაობაზე. "ტელეგრამარხი" "ფსკოვის გუბერნია" თვითმხილველებზე დაყრდნობით წერს, რომ წუხელ აეროპორტთან ისმოდა ავტომატის ხმა და ინტენსიური სროლა. რეგიონის გუბერნატორმა მიხაილ ვედერნიკომ განაცხადა, რომ ფსკოვში, კრესტის რაიონში, სამხედრო აეროპორტთან საჰაერო სივრცის კონტროლისას, აღმოაჩინეს "ამოუცნობი მფრინავი ობიექტი".
"ვიდეოზე ასახულია მისი ნეიტრალიზაცია, თუმცა მიწაზე არანაირი კვალი არ ჩანს", - განაცხადა მან.
შეგახსენებთ, ქალაქ ფსკოვის კრესტის რაიონში მდებარეობს სამხედრო აეროდრომი, რომელზეც 30 აგვისტოს, დრონებით დიდი საჰაერო შეტევა განხორციელდა, რომლის შედეგადაც ოკუპანტის 4 თვითმფრინავი გაანადგურა, დაზიანდა კიდევ რამდენიმე.
1- ლ სექტემბერს, დილით, მოსკოვის მერმა სერგეი სობიანინმა ასევე "ტელეგრამით" გაავრცელა ინფორმაცია, რომ საჰაერო თავდაცვის ძალებმა აღკვეთეს მოსკოვში დრონის შეღწევა და ის მოსკოვის ოლქის ლიუბერცის რაიონში ჩამოაგდეს. მისი მტკიცებით, არავინ დაშავებულა და არც არაფერი დანგრეულა. მოგვიანებით უკვე რუსეთის თავდაცვის სამინისტრომ დაადასტურა, რომ მოსკოვის ოლქის ამ რაიონში გაანადგურეს "თვითმფრინავის ტიპის უკრაინული უპილოტო საფრენი აპარატი".
რუსული მედიის ცნობით, მოსკოვის შერემეტიევოს, ვნუკოვოს, დომოდედოვოს და ჟუკოვსკის აეროპორტებში 60-ზე მეტი ავიარეისი გაუქმდა ან გადაიდო.
ასევ გავრცელდა ინფორმაცია ბელგოროდის ოლქში დრონის ჩამოგდებაზე.
დრონებით შეტევის შედეგად საცხოვრებელი სახლისა და ადმინისტრაციული შენობის დაზიანების შესახებ გაავრცელა ცნობა კურსკის ოლქის გუბერნატორმა რომან სტაროვოიტმაც.
მისივე თქმით, ორი უკრაინული დრონი დაესხა კურსკის ოლქის ქალაქ კურჩატოვსაც, სადაც ატომური ელექტროსადგური მდებარეობს.
მისი ინფორმაციით, თავდასხმის შედეგად დაზიანდა ადმინისტრაციული შენობა და საცხოვრებელი კორპუსი.
"კურჩატოვს დილით ორი უკრაინული დრონი დაესხა თავს. დაზიანდა ადმინისტრაციული შენობა და საცხოვრებელი კორპუსი. ადგილზე სპეციალისტები იმყოფებიან. დეტალები ზუსტდება“, - წერს გუბერნატორი "ტელეგრამარხზე".
რუსული სახელისუფლო მედია ამ ფაქტს "ბირთვულ ტერორიზმად" აფასებს.
ქალაქი კურჩატოვი, სადაც კურსკის ატომური ელექტროსადგურია განთავსებული, უკრაინის საზღვრიდან დაახლოებით 70 კილომეტრში მდებარეობს.
იხილეთ ასევე: