მგზავრობა მატარებლით და შეხვედრა კოსმოდრომზე: ორი ქვეყნის დიქტატორმა ლიდერებმა პირველი განცხადებები უკვე გააკეთეს - "ყველა საკითხზე აუჩქარებლად ვისაუბრებთ. არის დრო"
ვლადიმერ პუტინი და კიმ ჩენ ინი ერთმანეთს კოსმოდრომ "ვოსტოჩნიზე“ შეხვდნენ. როგორც რუსული მედია წერს, რუსეთის პრეზიდენტსა და ჩრდილოეთ კორეის ლიდერს შორის ამურის ოლქში თავდაპირველად მოკლე საუბარი შედგა.
"მიხარია თქვენი ნახვა", - უთხრა პუტინმა ჩრდილოეთ კორეის ლიდერს ხელის ჩამორთმევის შემდეგ, რომელიც დაახლოებით ორმოცი წამი გაგრძელდა.
მედიის ინფორმაციით, ჩრდილოეთ კორეის ლიდერმა მადლობა გადაუხადა პუტინს რუსეთში მიწვევისთვის.
"გმადლობთ, რომ მოგვიწვიეთ, მიუხედავად თქვენი დატვირთული გრაფიკისა“, - განაცხადა კიმ ჩენ ინმა შეხვედრისას.
რუსეთისა და ჩრდილოეთ კორეის ლიდერებმა კოსმოსური კომპლექსი დაათვალიერეს. ვლადიმერ პუტინმა აღნიშნა, რომ კიმ ჩენ ინი "დიდ ინტერესს იჩენს სარაკეტო ტექნოლოგიის მიმართ“.
"აშშ-ის ხელისუფლების განცხადებით, პუტინსა და კიმ ჩენ ინს შორის მოლაპარაკებები უკრაინის ომისთვის იარაღის მიწოდებას შეეხება. ჩრდილოეთ კორეას აქვს საარტილერიო ჭურვების და უმართავი რაკეტების მნიშვნელოვანი მარაგი, რომელიც შეიძლება გამოყენებულ იქნას საბჭოთა ეპოქის სამხედრო აღჭურვილობასთან ერთად უკრაინაზე თავდასხმისთვის", - იტყობინება Bloomberg.
კითხვას, - განიხილება თუ არა შეხვედრაზე DPRK-თან სამხედრო-ტექნიკური თანამშრომლობა? - პუტინმა ასე უპასუხა: "ჩვენ ყველა საკითხზე აუჩქარებლად ვისაუბრებთ. არის დრო".
რუსეთის პრეზიდენტის განცხადებით, რუსეთი ჩრდილოეთ კორეას საკუთარი კოსმოსური თანამგზავრების აგებაში დაეხმარება...
კერძოდ, კითხვაზე: "დაეხმარება თუ არა რუსეთი ჩრდილოეთ კორეას საკუთარი თანამგზავრების აგებაში", - პუტინმა უპასუხა: "სწორედ ამიტომ მოვედით აქ. კორეის სახალხო დემოკრატიული რესპუბლიკის ლიდერი დიდ ინტერესს იჩენს სარაკეტო ტექნოლოგიების მიმართ, ისინი ცდილობენ განავითარონ კოსმოსი. ჩვენ მათ ჩვენს ახალ ობიექტებს ვაჩვენებთ".
მოლაპარაკებების მოკლე, საჯარო ნაწილის დროს კიმ ჩენ ინმა ასევე თქვა, - რუსეთი ადგა თავისი სუვერენიტეტის დასაცავადო. მისივე თქმით, ჩრდილოეთ კორეას სურს ურთიერთობების განვითარება, რადგან ის ყოველთვის მხარს უჭერდა "პრეზიდენტ პუტინისა და რუსეთის მთავრობის ყველა გადაწყვეტილებას".
შეხვედრის დახურული ნაწილი გაფართოებულ ფორმატში (რასაც თავდაცვის მინისტრი სერგეი შოიგუც დაესწრო) საათნახევარი გაგრძელდა, შემდეგ პუტინმა და კიმ ჩენ ინმა პირისპირ საუბარი დაიწყეს, - იუწყება კრემლის პრესსამსახური.
როგორც ცნობილია, კიმ ჩენ ინი კოსმოდრომის სარკინიგზო სადგურამდე სპეციალური მატარებლით ჩავიდა და შემდეგ გზა ლიმუზინით გააგრძელა. ჩრდილოეთ კორეის მეთაურს რუსეთის აღმოსავლეთის სამხედრო ოლქის საპატიო ყარაულით დახვდნენ.