ლიტვის პრეზიდენტმა მოქალაქეობა ჩამოართვა 51 წლის მოციგურავეს, რომელმაც მონაწილეობა მიიღო პესკოვის ცოლის შოუში და არ დაგმო უკრაინის ომი
ლიტვის პრეზიდენტმა გიტანას ნაუსედამ ხელი მოაწერა განკარგულებას, 51 წლის მოციგურავე მარგარიტა დრობიაზკოსთვის ლიტვის მოქალაქეობის ჩამორთმევის შესახებ.
დრობიაზკოსთვის მოქალაქეობის ჩამორთმევა ქვეყნის შინაგან საქმეთა სამინისტრომ მოითხოვა. განცხადებაში ნათქვამია, რომ მოციგურავემ არ დაგმო უკრაინის ომი და მონაწილეობა მიიღო ტატიანა ნავკას (დიმიტრი პესკოვის მეუღლის) ყინულის შოუში.
ივლისის ბოლოს ლიტვის შინაგან საქმეთა მინისტრმა აგნე ბილოტაიტემ მიმართა ნაუსედას დრობიაზკოს მოქალაქეობის ჩამორთმევის შესახებ.
ლიტვის შინაგან საქმეთა სამინისტრომ აღნიშნა, რომ დრობიაზკო პირად და პროფესიულ კავშირებს ინარჩუნებს მოციგურავესთან და რუსეთის პრეზიდენტის პრესმდივნის დიმიტრი პესკოვის მეუღლესთან, ტატიანა ნავკასთან და სანქცირებულ სხვა პირებთან, ასევე ფლობს საკუთრებას რუსეთის მიერ ანექსირებულ ყირიმში.
გარდა ამისა, დეპარტამენტმა აღნიშნა, რომ დრობიაზკომ არ დაგმო უკრაინის ომი და მისი მონაწილეობა ნავკას ყინულის შოუში "ხელს უწყობს რუსეთის, როგორც დიდი ქვეყნის იმიჯის პოპულარიზაციას“.
ერთი დღით ადრე დრობიაზკომ სოციალურ ქსელში გამოაქვეყნა მიმართვა ლიტვის პარლამენტისადმი, რომელშიც, მიუხედავად იმისა, რომ უკრაინის ომს უწოდა "ტრაგედია მილიონობით ადამიანისა და ოჯახისთვის", მან ხაზგასმით აღნიშნა, რომ უფლება აქვს საჯაროდ არ გაახმოვანოს თავისი პოლიტიკური პოზიცია, თუ "მას არ შეუძლია, არ სურს და არ არის მზად ამის გასაკეთებლად..."
დრობიაზკომ ლიტვის მოქალაქეობა 1993 წელს, გამონაკლისის სახით მიიღო - როგორც სპეციალური პროცედურის ნაწილი ლიტვის სპორტისთვის და ქვეყნის პოპულარიზაციისთვის.
51 წლის დრობიაზკო ლიტვის ცამეტგზის ჩემპიონია, ევროპის ჩემპიონატის ორგზის მედალოსანი და ყინულის ცეკვაში მსოფლიო ჩემპიონატის მედალოსანი.
მოციგურავე დაიბადა მოსკოვში, მაგრამ სსრკ-ს დაშლის შემდეგ პოვილას ვანაგასთან ერთად ლიტვაში ასპარეზობდა. მას და დრობიაზკოს 2022 წელს ჩამოართვეს სახელმწიფო ჯილდოები სოჭში ნავკას შოუში მონაწილეობისთვის.
”ეჭვი არ მეპარება, რომ ყინულის მოცეკვავეების ეს წყვილი შესანიშნავი სპორტსმენები იყვნენ. მაგრამ მათ წაშალეს თავიანთი დამსახურება ლიტვის სახელმწიფოსთვის, რისთვისაც 2000 წელს დააფასეს“, - თქვა მაშინ ნაუსედამ.
წელს ლიტვის პარლამენტმა მიიღო ცვლილებები, რომლის მიხედვითაც ლიტვის მოქალაქეობის ჩამორთმევა შესაძლებელია ორმაგი მოქალაქეობის მქონე პირისთვის, თუ ის საჯაროდ გამოხატავს მხარდაჭერას სახელმწიფოს მიმართ, რომელიც საფრთხეს უქმნის ლიტვის ან მისი მოკავშირეების უსაფრთხოების ინტერესებს.