რასელ ბრენდს ოთხი ქალი გაუპატიურებასა და სექსუალურ შევიწროებაში ადანაშაულებს - რას პასუხობს ბრალდებას ვარსკვლავი
ბრიტანელ კომიკოსსა და მსახიობ რასელ ბრენდს ბრალად ედება გაუპატიურება, სექსუალური და ემოციური ძალადობა. მედიის ცნობით, საქმე ეხება შემთხვევებს, რომელიც ხდებოდა შვიდი წლის განმავლობაში, იმ პერიოდში, როცა რასელ ბრენდი კარიერის მწვერვალზე იყო.
ინფორმაცია გამოქვეყნდა Sunday Times-ში, the Times-სა და Channel 4-ში და ეყრდნობა გამოცემების ერთობლივი გამოძიების შედეგებს. გამოძიების თანახმად, მსახიობს ოთხი ქალი ადანაშაულებს სექსუალურ ძალადობაში. ძალადობის ფაქტები კი 2006-2013 წლებში მოხდა.
რასელ ბრენდმა უარყო ბრალდებები და თქვა, რომ მისი ყველა ურთიერთობა ემყარებოდა პარტნიორთან თანხმობას. აღსანიშნავია, რომ ბრალდებების გამოქვეყნებიდან რამდენიმე საათში მსახიობმა გამართა დაგეგმილი კომედიური სპექტაკლი, ლონდონში. აუდიტორიასთან გამოსვლისას კი ამ ბრალდებებზე ირიბად მიანიშნა. თქვა, რომ არსებობს რაღაცები, სურს საუბარი, თუმცა არ შეუძლია.
რას ამბობენ ბრალმდებლები?
- ერთი ქალი ამტკიცებს, რომ რასელ ბრენდმა ის გააუპატიურა ლოს ანჯელესის სახლის კედელთან და იმავე დღიდან მკურნალობდა გაუპატიურების მსხვერპლთა კრიზისულ ცენტრში. The Times წერს, რომ მათ ნახეს მტკიცებულებები, რომ ქალი მართლაც გადიოდა მკურნალობას აღნიშნულ ცენტრში.
- მეორე ქალის მტკიცებით, რასელ ბრენდი სექსუალურად ძალადობდა მასზე, როდესაც მსახიობი 30 წლის იყო, ხოლო ქალი 16-ის და ჯერ კიდევ სკოლაში დადიოდა. ბრალმდებელი ამბობს, რომ რასელ ბრენდი ურთიერთობისას ცდილობდა მის გაკონტროლებას და მოიხსენიებდა როგორც "ბავშვს“.
- მესამე ქალის თქმით, ბრენდმა მას სექსუალური შეურაცხყოფა მიაყენა. ქალი მსახიობთან მუშაობდა ლოს ანჯელესში. მისი მტკიცებით, ბრენდი დაემუქრა სამართლებრივი ზომების მიღებით თუკი ვინმეს ამის შესახებ ეტყობა.
- კიდევ ერთი ქალი კი ამბობს, რომ რასელ ბრენდი მას სექსუალურ, ფიზიკურ და ემოციურ შეურაცხყოფას აყენებდა.