რეგიონში მშვიდობის მიღწევის ერთადერთი გზა ყარაბაღიდან სომხური შეიარაღებული ძალების გაყვანაა - აზერბაიჯანის საგარეო უწყება

აზერბაიჯანულმა მხარემ არაერთხელ განაცხადა, რომ სომხური შეიარაღებული ძალების აზერბაიჯანის ყარაბაღის რეგიონში ყოფნა, 2020 წლის 10 ნოემბერს ხელმოწერილი სამმხრივი დეკლარაციის დებულებებს ეწინააღმდეგება და რეგიონულ მშვიდობასა და სტაბილურობას სერიოზულ საფრთხეს უქმნის, - ამის შესახებ აზერბაიჯანის საგარეო საქმეთა სამინისტროს განცხადებაშია აღნიშნული.

"რეგიონში მშვიდობისა და სტაბილურობის მიღწევის ერთადერთი გზა არის სომხური შეიარაღებული ძალების უპირობო და სრული გაყვანა აზერბაიჯანის ყარაბაღის რეგიონიდან, ე.წ. რეჟიმის დაშლა“, - ნათქვამია უწყების განცხადებაში.

შეგახსენებთ, აზერბაიჯანის თავდაცვის სამინისტროს ცნობით, ყარაბაღში, კონსტიტუციური წესრიგის აღდგენის მიზნით, ანტიტერორისტული ღონისძიებები დაიწყეს, რომლის სამიზნეს მშვიდობიანი მოსახლეობა არ წარმოადგენს და მხოლოდ სამხედრო სამიზნეების მწყობრიდან გამოყვანა ხორციელდება.