აზერბაიჯანში აცხადებენ, რომ მიღწეულია შეთანხმება "ანტიტერორისტული ზომების შესაჩერებლად" - ფაშიანიანის თქმით, კი ერევანს შეთანხმების ტექსტის შემუშავებაში მონაწილეობა არ მიუღია
აზერბაიჯანის თავდაცვის სამინისტროს ინფორმაციით, ყარაბაღის რეგიონში მცხოვრები სომეხი მოსახლეობის წარმომადგენლების მიმართვის გათვალისწინებით, მიღწეულია შეთანხმება ანტიტერორისტული ზომების შეჩერების შესახებ.
უწყების ცნობით, შეთანხმება ითვალისწინებს ანტიტერორისტული ზომების შეჩერებას 20 სექტემბრის 13:00 საათიდან შემდეგი პირობებით: "აზერბაიჯანის რესპუბლიკის ყარაბაღის რეგიონში დისლოცირებული სომხეთის შეიარაღებული ძალების ფორმირებები და უკანონო შეიარაღებული ჯგუფები ყრიან იარაღს, ტოვებენ საბრძოლო პოზიციებს და სამხედრო პუნქტებს და ექვემდებარებიან სრულ განიარაღებას; ამასთან, ხორციელდება მთელი საბრძოლო მასალისა და მძიმე სამხედრო ტექნიკის გაყვანა; ზემოაღნიშნული პროცესი ხორციელდება რუსულ სამშვიდობო კონტიგენტთან კოორდინაციით", - აღნიშნულია უწყების განცხადებაში.
- განცხადებას სომხეთის პრემიერ-მინისტრი, ნიკოლ ფაშინიანი გამოეხმაურა. მისი თქმით, ყარაბაღში ცეცხლის შეწყვეტის შეთანხმების ტექსტის შემუშავებაში ერევანს მონაწილეობა არ მიუღია.
"მთიანი ყარაბაღის ოფიციალური საინფორმაციო გვერდებიდან შევიტყვეთ, რომ მთიანი ყარაბაღის ხელისუფლებამ მიიღო რუსეთის სამშვიდობო კონტინგენტის სარდლობის წინადადება ცეცხლის შეწყვეტის შესახებ. ჩვენ გავეცანით ტექსტს. ამ ტექსტის შემუშავებაში სომხეთის რესპუბლიკა არანაირად არ მონაწილეობდა და დისკუსიის მხარე არ ყოფილა", - აღნიშნა ფაშინიანმა.
მისი თქმით, ყარაბაღში საომარი მოქმედებების ინტენსივობა მკვეთრად შემცირდა. „უახლესი ინფორმაცია, რაც ჩვენ მივიღეთ მთიანი ყარაბაღიდან არის შემდეგი, რომ სამხედრო მოქმედებების ინტენსივობა მკვეთრად შემცირდა. ვერ ვიტყვი, რომ ნულამდე დასული, მაგრამ მკვეთრად შემცირდა“, - განაცხადა ფაშინიანმა და იმედი გამოთქვა, რომ სამხედრო ესკალაცია არ გაგრძელდება.