"თუ ირანი ბირთვულ იარაღს შექმნის, მას არც საუდის არაბეთი ჩამორჩება" - საუდის არაბეთის პრინცის განცხადება
"საუდის არაბეთს არ სურს ბირთვული ბომბი, მაგრამ ეჭვგარეშეა, თუ ირანი ატომურ ბომბს შეიმუშავებს, ჩვენ მას არ ჩამოვრჩებით“, - ამის შესახებ საუდის არაბეთის პრინცმა მუჰამედ ბინ სალმანმა CBS-თან ინტერვიუში ისაუბრა.
მისივე განცხადებით, ატომური იარაღი უსაფრთხოებისა და ახლო აღმოსავლეთში ძალების დაბალანსებისთვის სჭირდება.
პრინცის მტკიცებით, თუ ირანი ატომურ იარაღს შექმნის, ხოლო მისი ავტორიტარული რეჟიმი ამ იარაღის გამოყენებას გადაწყვეტს - ეს, ფაქტობრივად, მთელი მსოფლიოსთვის ომის გამოცხადება იქნება.
"მსოფლიომ არ უნდა ნახოს მეორე ჰიროსიმა“, - აღნიშნა პრინცმა.
მუჰამედ ბინ სალმანის განცხადებას ირანის საგარეო საქმეთა სამინისტროს სპიკერი, ბაჰრამ ქასემი გამოეხმაურა:"მას წარმოდგენა არ აქვს პოლიტიკაზე, გულუბრყვილო ადამიანია, რომელიც წინდაუხედავად საუბრობს. მისი კომენტარი პასუხს არ იმსახურებს“, - განაცხადა ბაჰრამ ქასემმა.
ირანი და საუდის არაბეთი ახლო აღმოსავლეთის რეგიონში, ირანის ისლამური რევოლუციიდან მოყოლებული, ერთმანეთის მეტოქე სახელმწიფოები არიან. ორივე მათგანი რეგიონის დომინანტ ძალად ჩამოყალიბებას ცდილობს.