იტალიის ყველაზე მოუხელთებელი მაფიოზი და "კოზა ნოსტრას" ბოსი, მესინა დენარო გარდაიცვალა - დანაშაულების უსასრულო სია და კლინიკაში დასრულებული სიცოცხლე

იტალიის ყველაზე მოუხელთებელი მაფიოზი და "კოზა ნოსტრას" ბოსი, მესინა დენარო, საავადმყოფოში გარდაიცვალა. ინფორმაციას ადგილობრივი მედია ავრცელებს. დენარო 30 წლის განმავლობაში იძებნებოდა და პოლიციამ მისი დაკავება წელს, იანვარში მოახერხა.

მაფიოზი, სიცილიის დედაქალაქ პალერმოში, კერძო საავადმყოფოში დააკავეს, სადაც ის სიმსივნეზე მკურნალობდა. 61 წლის მესინა, მდგომარეობის გართულების გამო, ციხიდან საავადმყოფოში წინა თვეში გადაიყვანეს.

• "კოზა ნოსტრას" სათავეში ყოფნისას მესინა დენარო აკონტროლებდა ფულის გათეთრებას, ნარკოტიკებით ვაჭრობას, რეკეტს და უკანონო ნარჩენების გადაყრას. 1992 წელს მაფიის წინააღმდეგ მებრძოლი პროკურორების, ჯოვანი ფალკონესა და პაოლო ბორსელინოს მკვლელობებში მონაწილეობისთვის, 2002 წელს მესინა დენაროს დაუსწრებლად მიესაჯა სამუდამო პატიმრობა.
• მას ასევე ბრალი ედება ფლორენციაში, რომსა და მილანში მოწყობილ აფეთქებებში მონაწილეობაში, რამაც 1993 წელს 10 ადამიანის სიცოცხლე შეიწირა.

ადგილობრივი მედიის ცნობით, მესინა დენარო პარასკევს კომაში ჩავარდა. მას კიბოზე სამკურნალოდ ოპერაციაც ჩაუტარდა, თუმცა დენარომ ბოლო ოპერაციის შემდეგ გამოჯანმრთელება ვეღარ მოახერხა.

აკვილას მერმა, პიერლუიჯი ბიონდიმ დენაროს გარდაცვალება "ტვიტერზე" დაადასტურა და დაწერა, რომ ეს იყო "სინანულის გარეშე გატარებული არსებობის ეპილოგი და უახლესი ისტორიის ერთ-ერთი ყველაზე მტკივნეული ნაწილი, რომელსაც ვერ ამოვშლით".

იტალიელი გამომძიებლები დენაროს უახლოსესი ადამიანების თვალთვალით რამდენჯერმე მიუახლოვდნენ მაფიოზის ადგილსამყოფელს. პოლიციამ 2013 წელს მესინას და, პატრიცია და კიდევ რამდენიმე მასთან დაკავშირებული პირი დააკავა. სამართალდამცავებს ხელთ მესინა დენაროს მხოლოდ რამდენიმე ფოტო ჰქონდათ და მაფიოზის გარეგნობის რეკონსტრუირება წლების წინ გადაღებული ფოტოების საფუძველზე ხდებოდა, რაც მის პოვნას ართულებდა.

• "კოზა ნოსტრას" ბოსის დაკავების შემდეგ, წელს, პოლიციამ მის ბუნკერსაც მიაგნო

მედინას ბუნკერამდე გასასვლელი გზა მისი საცხოვრებელი სახლის კარადის უკან იყო დამალული. სამალავში ძვირფასი ქვები და ვერცხლის ჭურჭელი იპოვეს. აქვე იყო ცარიელი ყუთები, რაც იმაზე მიუთითებს, რომ დოკუმენტები, რომელიც პოლიციას სამხილებად უნდა გამოეყენებინა, მესინას დაკავების შემდეგ გადამალეს.

პროკურორი ჯან კარლო კასელი, რომელიც კიდევ ერთი იტალიელი მაფიოზის, სალვატორე "ტოტო“ რიინას დაკავებას ხელმძღვანელობდა, მესინა დენაროს დაპატიმრების შემდეგ ხალხს გაფრთხილებას აძლევდა, - ბოსების დაკავების მიუხედავად, სიფრთხილეა საჭირო, რადგან "კოზა ნოსტრას“ გადაჯგუფება და გადარჩენა ეხერხებაო.

წყარო: bbc

მოამზადა: ანა სიბოშვილმა