დასავლეთ ევროპის უმაღლესი მწვერვალი სწრაფად კარგავს სიმაღლეს - რას ამბობენ მეცნიერები?

დასავლეთ ევროპის უმაღლესმა მწვერვალმა მონბლანმა ბოლო ორი წლის განმავლობაში სიმაღლეში ორ მეტრზე მეტით დაიკლო. ამას მოწმობს ფრანგი მეცნიერების მიერ ჩატარებული კვლევის შედეგები, - წერს Reuters - ი.

ექსპერტთა ჯგუფმა, რომელიც ყოველ ორ წელიწადში ერთხელ ზომავს მთას, 6 ოქტომბერს გამართულ პრესკონფერენციაზე განაცხადა, რომ მთის ამჟამინდელი სიმაღლე 4805,59 მეტრია. წინა გაზომვისას, 2021 წლის სექტემბერში სიმაღლე იყო 4807,81 მეტრი.

მეცნიერების თქმით, კლიმატოლოგიისა და გლაციოლოგიის (მყინვარების მეცნიერება) დარგის ექსპერტებს ჯერ ბოლომდე არ შეუსწავლიათ მიღებული მონაცემები, რათა ეს ფენომენი ახსნან.

ისინი ამას დიდ წილად კლიმატურ ცვლილებებს უკავშირებენ, მონბლანის წვერი ხომ ყინულის სქელი ფენით არის დაფარული.

Reuters - ი აღნიშნავს, რომ მონბლანის ოფიციალური სიმაღლე იცვლება ბოლო 10 წელიწადია. 2007 წელს ეს შეადგენდა 4810,90 მეტრს.

• მონბლანი (ფრანგ. Mont Blanc, იტალ. Monte Bianco, სიტყვასიტყვით "თეთრი მთა“) წარმოადგენს კრისტალურ მასივს (მასივის სიგრძეა 50 კმ) და ამავე სახელწოდების მწვერვალს დასავლეთ ალპებში, საფრანგეთისა და იტალიის საზღვარზე.
• მონბლანის ქვეშ გაყვანილია 11,6 კმ სიგრძის საავტომობილო გვირაბი, რომელიც საფრანგეთსა და იტალიას აკავშშირებს. მონბლანის დასავლეთ კალთის ძირში, საფრანგეთის მხარეს, მდებარეობს განთქმული სამთო-სათხილამურო კურორტი შამონი, სადაც ისტორიაში პირველი ზამთრის ოლიმპიური თამაშები გაიმართა.