სომხეთის პრეზიდენტმა ხელი მოაწერა კანონს რომის სტატუსის რატიფიკაციის შესახებ - ეს ნიშნავს, რომ თუ პუტინი ამ ქვეყანაში ჩავა, უნდა დააკავონ: როგორია კრემლის პასუხი
სომხეთის პრეზიდენტმა ვაჰაგნ ხაჩატურიანმა ხელი მოაწერა კანონს რომის სტატუსის რატიფიკაციის შესახებ. აღნიშნულზე განცხადება პრეზიდენტის ოფიციალურ ვებგვერდზე გამოქვეყნდა.
პარლამენტმა რატიფიკაცია 3 ოქტომბერს მოახდინა, თუმცა პრეზიდენტის ხელმოწერას საჭიროებდა. კრემლში აცხადებენ, რომ ეს გადაწყვეტილება ორმხრივი ურთიერთობებისთვის არასწორი ნაბიჯია.
- აღსანიშნავია, რომ 13 ოქტომბერს ბიშკეკში გამართულ პრესკონფერენციაზე, რუსეთის პრეზიდენტმა ვლადიმერ პუტინმა განაცხადა, რომ დაურეკა სომხეთის პრემიერ-მინისტრს, ნიკოლ ფაშინიანს და განიხილა მასთან დსთ-ს მოახლოებული სამიტი. პუტინის აზრით, სომხეთი არ აპირებს დსთ-ს დატოვებას, ასევე განაცხადა, რომ მზად არის ეწვიოს სომხეთს.
"ჩვენ კონტაქტზე ვართ, ვმუშაობთ მასთან, მუდმივად ხაზზე ვართ. სიტუაცია რომ დასტაბილურდება - მე მათთან წავალ და ისინი ჩამოვლენ, ის ჩამოვა", - განაცხადა პუტინმა (გულისხმობს ფაშინიანს).
შეგახსენებთ, 2023 წლის 17 მარტს სისხლის სამართლის საერთაშორისო სასამართლომ გასცა რუსეთის პრეზიდენტ ვლადიმირ პუტინის და ბავშვთა უფლებების კომისარ მარია ლვოვა-ბელოვას დაპატიმრების ორდერები.
სასამართლოს თანახმად, პუტინი და ლვოვა-ბელოვა, სავარაუდოდ, პასუხისმგებელნი არიან ომის დანაშაულის ჩადენაზე - უკრაინის ოკუპირებული ტერიტორიებიდან ბავშვების უკანონო დეპორტაციაზე. თუკი ვლადიმირ პუტინი "რომის სტატუტის" ხელმომწერ რომელიმე ქვეყანაში ჩავა, იგი უნდა დააკავონ.
სომხეთის პრემიერ-მინისტრის, ნიკოლ ფაშინიანის მტკიცებით, რომის სტატუტის რატიფიცირება რუსეთის წინააღმდეგ მიმართული ქმედება არ არის. მისი თქმით, სომხეთის რესპუბლიკა აპირებს მიმართოს სისხლის სამართლის საერთაშორისო სასამართლოს აზერბაიჯანისთვის პასუხისმგებლობის დაკისრების მიზნით, კერძოდ, 2022 წლის სექტემბრის მოვლენებთან და სხვა ეპიზოდებთან დაკავშირებით.