მოკლულია "ჰამასის" ერთ-ერთი დამფუძნებლის ქვრივი, ღაზაში განადგურებულია ასობით ობიექტი - ბოლო მონაცემები ცხელი წერტილიდან

ისრაელის თავდაცვის ძალების განცხადებით, ღაზაში, ბოლო 24 საათის განმავლობაში, ასობით ობიექტს დაარტყეს.

• თავდაცვის ძალებში განმარტავენ, რომ მათი სამიზნე "ჰამასის" ინფრასტრუქტურაა და ბოლო დღე-ღამის განმავლობაში განადგურებულ ობიექტებს შორის არიან ტანკსაწინააღმდეგო რაკეტების გაშვების ადგილები, გვირაბები და შტაბ-ბინები.

ისრაელის თავდაცვის ძალებში ასევე აცხადებენ, რომ "სახალხო წინააღმდეგობის კომიტეტების" სამხედრო ფრთის ხელმძღვანელის, რაფატ აბუ ჰილალის ლიკვიდაცია განხორციელდა. აღნიშნული ორგანიზაცია სიდიდით მესამე შეიარაღებული დაჯგუფებაა ღაზაში "ჰამასის" და პალესტინის "ისლამური ჯიჰადის" შემდეგ.

• The Times of Israel-ის ინფორმაციით, ისრაელის საჰაერო თავდასხმის შედეგად დაიღუპა "ჰამასის" ერთ-ერთი დამფუძნებლის, აბდელ აზიზ ალ-რანტისის ქვრივი ჯამილა ალ-შანტი, პირველი ქალი, რომელიც დაჯგუფების პოლიტიკური ბიუროს წევრად აირჩიეს.

ინფორმაცია იმის შესახებ, თუ სად მოხდა თავდასხმა, არ ვრცელდება, თუმცა აღნიშნულია, რომ ის გამთენიისას განხორციელდა.

ალ-შანტი 2021 წელს პირველი ქალი გახდა, რომელიც "ჰამასის“ პოლიტიკურ ბიუროში, გადაწყვეტილების მიმღებ უმაღლეს ორგანოში აირჩიეს. მისი ქმარი, აზიზ ალ-რანტისი 2004 წელს ისრაელის საჰაერო თავდასხმის შედეგად დაიღუპა.