ჯორჯ კლუნის ფონდი გერმანიის პროკურატურას უკრაინაში რუსი სამხედროების დანაშაულის გამოძიებას სთხოვს - კონკრეტულად რომელი საქმეების გამოძიებას ითხოვს ფონდი?

ჯორჯ კლუნის ფონდმა გერმანიის პროკურატურას უკრაინაში რუსი სამხედროების დანაშაულის გამოძიების თხოვნით მიმართა. საქმე ეხება ათეულობით ადამიანის წამებასა და მკვლელობას. ფონდი სამი კონკრეტული სამხედრო დანაშაულის გამოძიებას ითხოვს.

განცხადებები გერმანიის პროკურატურას ერთი მიზეზით წარედგინა - ქვეყნის სამართალდამცავ ორგანოებს შეუძლიათ დაიწყონ სისხლის სამართლის გამოძიება გერმანიის ფარგლებს გარეთ ჩადენილი დანაშაულების შესახებ, განურჩევლად ეჭვმიტანილის ან მსხვერპლის მოქალაქეობისა. უფრო მეტიც, კონკრეტულად ამ სამ შემთხვევაში, მსხვერპლთა ნაწილი გერმანიაში ცხოვრობს, ნაწილი კი მზადაა ქვეყანაში ჩავიდეს და ჩვენება მისცეს.

ეჭვმიტანილები რუსული არმიის უფროსი და საშუალო დონის მეთაურები არიან. ფონდის მიერ პროკურატურაში წარდგენილი დოკუმენტები შეიცავს მტკიცებულებებს დანაშაულების შესახებ, რომლებიც ექსპერტებმა საველე კვლევების დროს შეაგროვეს.

• პირველი შემთხვევა 2022 წლის ზაფხულში, ოდესის ოლქის სოფელ სერგეევკას Kh-22 რაკეტით დაბომბვას ეხება. შემთხვევას 22 ადამიანი ემსხვერპლა, 40 კი დაშავდა. ყველა მათგანი მშვიდობიანი მოქალაქეები იყვნენ. ფონდის განცხადებით, Kh-22 რაკეტას დაბალი სიზუსტე და მაღალი სიმძლავრე აქვს - ეს შეიძლება კლასიფიცირდეს ომის აკრძალულ მეთოდად. ამაზე პასუხისმგებელი უნდა იყოს რუსეთის ფედერაციის გენერალური შტაბის მთავარი დირექტორატის უმაღლესი სარდლობა.
• მეორე საქმე ეხება ხარკოვის რეგიონში ოთხი მამაკაცის დაკავებას, წამებასა და მკვლელობას. ისინი 2022 წლის მარტში დააკავეს თვითგამოცხადებული ლუგანსკის სახალხო რესპუბლიკის ძალებმა. დიდი ხნის განმავლობაში მათი ბედის შესახებ არაფერი იყო ცნობილი, ხოლო რამდენიმე თვის შემდეგ ცხედრები აღმოაჩინეს.
• მესამე საქმე ეხება კიევის რეგიონში მომხდარ მკვლელობებს, წამებას, სექსუალურ ძალადობასა და ძარცვას. საქმეში დაფიქსირებულია მინიმუმ 28 ადამიანის მკვლელობა, გაუპატიურების ხუთი შემთხვევა და რვა ადამიანის წამება. ეჭვმიტანილია ხუთი რუსი მეთაური, რომლებიც ოკუპაციაში მონაწილე დანაყოფებს ხელმძღვანელობდნენ.

თუ გერმანიის ხელისუფლებამ კონკრეტული ეჭვმიტანილების წინააღმდეგ წარდგენილი მტკიცებულებები დამაჯერებლად მიიჩნია, შეუძლიათ დაიწყონ სისხლის სამართლის გამოძიება და გასცენ დაკავების ორდერი, მათ შორის საერთაშორისო ევროპოლისა და ინტერპოლის სისტემების მეშვეობით.