"ვცდილობ, მუსიკით გავაქარწყლო მგზავრების პრობლემები" - ვინ არის მომღერალი ტაქსის მძღოლი, რომლის ვიდეო სოციალურ ქსელში ვირუსულად გავრცელდა
ორიოდე დღის წინ, სოციალურ ქსელში გავრცელდა ტაქსის მძღოლის მიერ საოცრად შესრულებული სიმღერის ვიდეო, რომელსაც დიდი გამოხმაურება მოჰყვა. ახალგაზრდა კაცი, რომელმაც საზოგადოებაში დიდი მოწონება დაიმსახურა, 35 წლის ალექსანდრე ალიმბარაშვილია.
ის ამბობს, რომ დღის გამავლობაში ბევრი დასტრესილი ადამიანი ჯდება მის მანქანაში და სიმღერით ცდილობს მგზავრების გახალისებას. სწორედ ასე იყო რამდენიმე დღის წინაც, როცა ერთ-ერთი მგზავრი გადაჰყავდა, სიმღერა დაიწყო, რაც მგზავრმა გადაიღო და სოციალურ ქსელში ატვირთა.
"დღის განმავლობაში ბევრი დასტრესილი ადამიანი მიჯდება და ვცდილობ, მუსიკით გავაქარწყლო მათი პრობლემები. უმეტესად მიღებენ ვიდეოს, მაგრამ არავის არსად გამოუქვეყნებია. ეს ბოლო შემთხვევა რაც იყო, ძალიან სასიამოვნოა ჩემთვის და იმედია, ეს "აფეთქება" სწორად გაგრძელდება და ვეცდები ხალხის იმედები გავამართლო", - ამბობს ალექსანდრე ალიმბარაშვილი.
ალექსანდრე ამბობს, რომ 5 წლის ასაკიდან მღერის და სიმღერა მისი ცხოვრების განუყოფელი ნაწილია. 2012 წელს მუსიკალურ პროექტში "ახალი ხმა“ იღებდა მონაწილეობას.
"დავამთავრე ილიას უნივერსიტეტი, ბიზნესის მიმართულებით და კონსერვატორია. ორივე პროფესიას ვიყენებ. ჩემი მცირე ბიზნესი მაქვს. ვემსახურები როგორ უცხოელ, ასე ქართველ ტურისტებს. ბედნიერი ვარ, იმიტომ რომ ვაკეთებ იმ საქმეს, რაც ძალიან მიყვარს. ჩემი ცხოვრების ნახევარი უკავია მუსიკას. მინდა, რომ დავაბალანსო და ჩემს ცხოვრებაში ტურიზმი და მუსიკა ერთად იყოს“, - ამბობს ალექსანდრე ალიმბარაშვილი "პალიტრავიდეოსთან".
ავტორი: თიკო გურაშვილი