იტალიაში წყალდიდობას და ქარიშხალს ებრძვიან, გამოცხადდა საგანგებო მდგომარეობა - დაიტბორა სახლები, საავადმყოფოები, წყალმა წაიღო მანქანები, არის მსხვერპლი (ფოტოები)

იტალიაში, ტოსკანას რეგიონში წყალდიდობაა. ბოლო ინფორმაციით, სტიქიის შედეგად ხუთი ადამიანი დაიღუპა და რამდენიმე დაკარგულად ითვლება. გადაუღებელ წვიმას იტალიაში თან ახლავს ქარიშხალი.

როგორც BBC წერს, ხალხი სახურავებზე ავიდა წყალდიდობისგან თავის დასაღწევად, ზოგიერთ ქალაქში წყალმა მანქანები წაიღო. დაიტბორა შენობები - საცხოვრებელი სახლები, ასევე ოთხი საავადმყოფო.

• აღსანიშნავია, რომ დასავლეთ ევროპა რამდენიმე დღეა ქარიშხალ "კიარანს" ებრძვის. ქარიშხალმა სხვადასხვა ქვეყანაში, საერთო ჯამში, 12-ზე მეტი ადამიანი იმსხვერპლა. "კიარანმა" მოიცვა საფრანგეთი, ბელგია, ნიდერლანდები, ინგლისი, გერმანია, ასევე ესპანეთი და პორტუგალია. ბელგიაში დაღუპულთა შორისაა ხუთი წლის ბავშვი, რომელსაც ქარისგან მოგლეჯილი ხე დაეცა.

ქარიშხალმა ტოსკანაში ხუთშაბათს ღამით მიაღწია. რეგიონის გუბერნატორმა საგანგებო მდგომარეობა გამოაცხადა. ყველაზე მეტად დაზარალდა ლივორნოს სანაპირო და ფლორენციის მახლობლად მდებარე ქალაქები, პრატო და მონტემურლო.

მონტემურლოში მდინარე ბისენციო ადიდდა და კალაპოტიდან გადმოვიდა. ქალაქში, ერთ-ერთი დატბორილი სახლის პირველ სართულზე 85 წლის მამაკაცი გარდაცვლილი იპოვეს.

"ბოლო ასი წლის განმავლობაში ეს უპრეცედენტო ნალექია“, - ამბობს ტოსკანას გუბერნატორი. დაკარგულთა შორისაა წყვილი, რომელთა ავტომობილიც ფლორენციის დასავლეთით ამოტრიალებული იპოვეს.