"ალბათ იმიტომ ვერ პოულობთ, რომ დათვებმა შეჭამეს" - აფხაზეთში მთელი ღამე "დივერსანტებს" ეძებდნენ: როგორ "დატროლა" სოლოვიოვმა ფეიკით აფხაზეთის ფეიკი "ხელისუფლება" და რას წერენ აფხაზები?
აფხაზეთში წუხელ "რთული ღამე" ჰქონდათ. ყველაფერი იმით დაიწყო, რომ კრემლის პროპაგანდისტმა ვლადიმერ სოლოვიოვმა "ტელეგრამის" არხზე "სკანდალური" ინფორმაცია გამოაქვეყნა. სოლოვიოვი წერდა, რომ "აფხაზეთში საქართველოდან 50-კაციანი დივერსიული ჯგუფი გადავიდა, რომელიც სოხუმის აეროპორტზე ტერორისტულ თავდასხმას გეგმავდა".
ეს ის აეროპორტია, რომელიც 1993 წლის შემდეგ აღარ ფუნქციონირებს და ასე გამოიყურება.
ოკუპანტი სოლოვიოვის ვერსიით, ჩვენი ქვეყნის მიერ კონტროლირებადი ტერიტორიიდან გადასულ ჯგუფს აქ ტერორისტული აქტის მოწყობა სურდა.
რა თქმა უნდა, ამბავი აქ არ დასრულდა, ოკუპირებულ აფხაზეთში სასწრაფოდ შექმნეს ე.წ. ოპერატიული შტაბი, თუმცა როგორც "ტელეგრამში", აფხაზურ არხებზე წერდნენ, ე.წ. პრეზიდენტს, ასლან ბჟანიას ვერსად პოულობდნენ. მოგვიანებით გაირკვა, რომ თურმე ბჟანია მოსკოვში იმყოფებოდა.
აფხაზეთის ე.წ. ხელისუფლებისთვის გამოწვევა კიდევ უფრო გართულდა. "მთავრობა" ფაქტობრივად, "პრეზიდენტის" გარეშე უნდა გამკლავებოდა "დივერსანტებს" და აღეკვეთა "ტერორიზმი".
- მოგვიანებით განაცხადეს, რომ დივერსანტების ჯგუფი არა 50-კაციანი, არამედ 7-კაციანი იყო. განცხადება ამის შესახებ აფხაზეთის ე.წ. შს მინისტრმა, რობერტ კიუტიმ გააკეთა. მისი თქმით, გულრიფშის რაიონში აფხაზეთის ე.წ. ძალოვანი სტრუქტურები შეიარაღებული ადამიანების ჯგუფს ეძებდნენ მას შემდეგ, რაც ისინი ადგილობრივმა მონადირეებმა შეამჩნიეს.
კიუტმა აღნიშნა, რომ მონადირეების ცნობით, შეიარაღებული ადამიანების ჯგუფს რამე საიდენტიფიკაციო ნიშნები არ გააჩნდა.
“ისინი უცხოური იარაღით იყვნენ შეიარაღებული, სავადაუდოდ М-4 შაშხანებით, შავ ფორმაში, ნიღბებით, ჩაფხუტებით, კარგად ეკიპირებულნი. მათ ასევე დრონი გააჩნდათ, რომელიც ტერიტორიაზე დაფრინავდა”, - განაცხადა კიუტმა. მისი განცხადება აფხაზურმა "სპუტნიკმა" გაავრცელა. კიუტმა ასევე აღნიშნა, რომ სოხუმამდე ყველა მისასვლელი გადაკეტილია.
ცოტა ხანში ამბავი კიდევ უფრო კომიკური გახდა. საქმეში უკვე ტელეგრამზე "სამხრეთ ოსეთის" არხები ჩაერთნენ - წერდნენ, რომ "მათი წყაროს ინფორმაციით" აფხაზეთში 6-კაციანი ჯგუფი დააკავეს.
ახლა უკვე ამბის ფინალისკენ მივდივართ:
- კვლავ "სპუტნიკმა" აფხაზეთის ე.წ. შს სამინისტროზე დაყრდნობით დაწერა, რომ ინფორმაცია აფხაზეთის ტერიტორიაზე დივერსანტების შეღწევის შესახებ დადასტურებული არ არის.
აღსანიშნავია ოკუპირებულ აფხაზეთში მცხოვრები ადამიანების რეაქციები ამ ამბავზე. სოციალურ ქსელებში გამოხატული რეაქციებით თუ ვიმსჯელებთ, მათი უმეტესობისთვის ეს ინფორმაცია არასერიოზული აღმოჩნდა და ე.წ. ხელისუფლების დაცინვის საბაბად იქცა.
- გთავაზობთ "ტელეგრამში" აფხაზების მიერ დაწერილ ზოგიერთ კომენტარს:
"ბალახი ცუდია ხანდახან, მითუმეტეს როცა ნადირობ".
"არ ინერვიულოთ, ალბათ იმიტომ ვერ პოულობთ, რომ დათვებმა შეჭამეს".
"ბჟანია ყოველთვის მოსკოვში როგორ არის? ხალხო, იქნებ მოსკოვის პრეზიდენტი გახდა?".
ზოგიერთის ვერსიით, ადამიანთა ჯგუფი უბრალოდ პოპულარულ თამაშს "ეარსოფტს" თამაშობდა და აფხაზეთში დივერსანტები ეგონათ.
- და ბოლოს, ვლადიმერ სოლოვიოვმა "მცირე აჟიოტაჟის" მოწყობის შემდეგ "სკანდალური ინფორმაცია" წაშალა.
ნახეთ ასევე: