ათასწლეულების შემდეგ ლურჯი ვეშაპები სეიშელის კუნძულების მიდამოებში ბრუნდებიან - რას ამბობენ მეცნიერები გადაშენების პირას მყოფ ძუძუმწოვრებზე?

ლურჯი ვეშაპები - დედამიწაზე ყველაზე დიდი ცხოველები - ინდოეთის ოკეანის იმ ნაწილში სახლდებიან, სადაც ისინი ათწლეულების წინ ვეშაპებზე მონადირეებმა გაანადგურეს - საუბარია სეიშელის კუნძულების მიმდებარე ტერიტორიაზე.

წყალქვეშა აუდიო ჩანაწერების საშუალებით დაადგინეს, რომ ვეშაპები რეგიონში თვეების გამავლობაში რჩებიან. ვარაუდობენ იმასაც, რომ ისინი ამ ადგილს გასამრავლებლად იყენებენ.

მისიაში ჩართული მეცნიერები ამბობენ, რომ ეს კონსერვაციონისტების გამარჯვებაა, რადგან 1960-იან წლებში საბჭოთა კავშირის ვეშაპებზე მონადირე ფლოტმა სეიშელის კუნძულებზე ამ ცხოველების პოპულაცია სრულად გაანადგურა - 300 000-ზე მეტი ვეშაპი დაიღუპა მხოლოდ სამხრეთ ნახევარსფეროში.

მეცნიერებს სურთ ზუსტად გაიგონ, თუ რამდენად მნიშვნელოვანია სეიშელის კუნძულები ლურჯი ვეშაპებისთვის - მისი ზღვების დაახლოებით 400,000 კვადრატული კილომეტრი (154,000 კვადრატული მილი) ახლა დაცულია, ტერიტორიაზე არ შეინიშნება გემების მოძრაობაც, რაც მას ვეშაპებისთვის უსაფრთხო ადგილად აქცევს.

• ლურჯი ვეშაპი დედამიწაზე ზომით ყველაზე დიდი ცხოველია. დღესდღეობით ისინი გადაშენების ზღვარზე მყოფ ცხოველებად ითვლებიან. მე-19 საუკუნეში დედამიწაზე 250 ათასი ლურჯი ვეშაპი სახლობდა, ხოლო 1967 წელს მათი რიცხვი 400-მდე შემცირდა.