კლიმატის ცვლილების სამიტი ნავთობმომპოვებელ ქვეყანაში - გარემოს დაცვისკენ მიმართული გადაწყვეტილებები, თუ ბიზნეს გარიგებების დადების შესაძლებლობა: დეტალები დუბაიდან
არაბთა გაერთიანებულ საამიროებში კლიმატის ცვლილების შესახებ სამიტი დაიწყო, რომელიც 2 კვირის განმავლობაში გაგრძელდება. ბევრისთვის ირონიულია ის ფაქტი, რომ სამიტი იმართება იმ ქვეყანაში, რომელიც მსოფლიოში ნავთობწარმოების თვალსაზრისით, მსოფლიოს ტოპ 10 ქვეყანას შორის არის.
ეს საკითხი დიდი ხანია განხილვისა და კრიტიკის საბაბია გარემოს დამცველთა ნაწილის მხრიდან, თუმცა კრიტიკის მიუხედავად, მსოფლიოს სხვადასხვა ქვეყნის ლიდერები ახლა დუბაიში არიან და მსჯელობენ კლიმატთან დაკავშირებულ პრობლემებსა და მათი გადაჭრის გზებზე.
- სამიტის გახსნის კონფერენციაზე სიტყვით გამოვიდა დიდი ბრიტანეთის მეფე ჩარლზი, რომლის მიმართვაც დამსწრეებისთვის ამაღელვებელი აღმოჩნდა და ტაშიც დაიმსახურა.
"დედამიწა ჩვენ არ გვეკუთვნის, ჩვენ ვეკუთვნით დედამიწას“, - თქვა ჩარლზმა. მეფემ აღნიშნა, რომ სასიცოცხლოდ მნიშვნელოვანია კიდევ უფრო დაჩქარებული ტემპით მუშაობა მწვანე ალტერნატივებზე, როგორიცაა მაგალითად განახლებადი ენერგიის გამოყენება ფაქტობრივად ყველა ინდუსტრიაში.
"ცვლილებებს შევძლებთ ერთად მუშაობით, ისეთი გადაწყვეტილებების მიღებით, რომელიც ხელს შეუწყობს ჩვენი სამყაროს არსებობას. ჩვენს მოქმედებებს უნდა მოჰყვეს შედეგი“, - აღნიშნა ჩარლზმა. მეფე ამბობს, რომ კლიმატის ცვლილების საფრთხე აღარ არის შორეული რისკი და ეს საფრთხე უკვე ჩვენთანაა.
სიტყვით გამოვიდა გაერთიანებული ერების ორგანიზაციის ხელმძღვანელი ანტონიო გუტერეში, რომელმაც ლიდერებს მიმართა და თქვა, რომ მხოლოდ მათ მიერ მიღებულ სწორ გადაწყვეტილებებს შეუძლია "დედამიწა განკურნოს".
"პოლარული ყინულები, მყინვარები ჩვენ თვალწინ ქრება რაც იწვევს ნგრევას მსოფლიოში, ხდება მეწყერი, წყალდიდობები, ზღვის დონის მატება", - თქვა გუტერეშემა.
- აღსანიშნავია, რომ არაბთა გაერთიანებული საამიროების პრეზიდენტის განცხადებით კლიმატის პრობლემის გადასაჭრელად ქვეყანა 30 მილიარდ დოლარს გამოყოფს. მუჰამენ ბინ ზაიდ ალ ნაჰიანის თქმით, მას სურს ეს ფული გამოიყენონ ღარიბმა ქვეყნებმა რათა გაუმკლავდნენ კლიმატის ცვლილების გავლენას.
განსაკუთრებით მნიშვნელოოვანია, რომ კლიმატის ცვლილების სამიტს ესწრებიან ნავთობით მდიდარი ქვეყნების ლიდერები. როგორც უკვე აღვნიშნეთ, მასპინძელი ქვეყანა, არაბთა გაერთიანებული საამიროები ნავთობის ტოპ ათ ყველაზე მსხვილ მწარმოებელ ქვეყანას შორის არის. ნავთობ სახელმწიფოში კლიმატის სამიტის გამართვა უკვე საკამათო საკითხი იყო.
გარემოს დამცველთა დიდი ნაწილის შეშფოთება მას შემდეგ გამძაფრდა, რაც BBC-მ გამოაქვეყნა ინფორმაცია იმის შესახებ, რომ რეალურად, არაბთა საამიროები გეგმავდა კლიმატის ცვლილების სამიტი გამოეყენებინა ნავთობისა და გაზის შეთანხმებების გასაფორმებლად.
გარემოს ზოგიერთი დამცველი და მათ შორის ცნობილი გრეტა თუნბერგი ამბობს, რომ მსგავს სამიტებს არანაირი სიკეთე არ მოაქვს და მხოლოდ არაფრისმომცემ სიტყვებს ვისმენთ, რეალურ და შედეგის მომტან გადაწყვეტილებებს კი არავინ იღებს.
სამიტს ესწრება საქართველოს პრემიერ-მინისტრი ირაკლი ღარიბაშვილიც.