თბილისში ორი პირის, მათ შორის სამართალდამცავის დაჭრის ბრალდებით ერთი პირი დააკავეს: რა მოხდა ზაარბრიუკენის მოედანზე

თბილისში ორი პირის, მათ შორის სამართალდამცავის დაჭრის ბრალდებით ერთი პირი დააკავეს. ამის შესახებ ambebi.ge-ს შსს-ში განუცხადეს. არსებული ინფორმაციით, ზაარბრიუკენის მოედანზე ორ დაპირისპირებულ მხარეს შორის სიტყვიერი და ფიზიკური დაპირისპირების განსამუხტად საპატრულო პოლიციის თანამშრომელი მივიდა. სამართალდაცავმა ერთი პირის დაკავება გადაწყვიტა, რა დროსაც ის ცივი იარაღით დაჭრეს.

შსს-ის ინფორმაციით, მომხდარის თაობაზე, შინაგან საქმეთა სამინისტროს საპატრულო პოლიციის დეპარტამენტის და თბილისის პოლიციის დეპარტამენტის ძველი თბილისის მთავარი სამმართველოს თანამშრომლებმა, ჩატარებული საგამოძიებო მოქმედებების შედეგად, 1984 წელს დაბადებული ნ.ვ. განზრახ მკვლელობის მცდელობის და სამსახურებრივი საქმიანობის შესრულების დროს პოლიციელზე თავდასხმის ბრალდებით დააკავეს.

დანაშაული 15 წლამდე ვადით თავისუფლების აღკვეთას ითვალისწინებს.

"გამოძიებით დადგინდა, რომ ბრალდებულმა, თბილისში, აღმაშენებლის გამზირზე, ურთიერთშელაპარაკების ნიადაგზე, 1985 წელს დაბადებულ, თ.ა.-ს ცივი იარაღით დაზიანებები მიაყენა.

ბრალდებულმა ნ.ვ.-მ დანით დაზიანება მიაყენა გამოძახების შედეგად შემთხვევის ადგილზე გამოცხადებულ საპატრულო პოლიციის თანამშრომელსაც.

ორივე დაჭრილი საავადმყოფოშია გადაყვანილი, სადაც შესაბამისი სამედიცინო დახმარება უტარდებათ.სამართალდამცველებმა ჩატარებული საგამოძიებო მოქმედებების შედეგად, ნ.ვ. ცხელ კვალზე დააკავეს.

განზრახ მკვლელობის მცდელობის და სამსახურებრივი საქმიანობის შესრულების დროს პოლიციელზე თავდასხმის ფაქტებზე გამოძიება სისხლის სამართლის კოდექსის 19-108-ე და 353-ე პრიმა მუხლებით მიმდინარეობს", - ნათქვამია ინფორმაციაში.