N1 ИЛ-96-300ПУ - თვითმფრინავი, რომლითაც რუსეთის პრეზიდენტი, ვლადიმერ პუტინი არაბთა გაერთიანებულ საამიროებს ეწვია, რუსეთის სამხედრო-საჰაერო ძალების ოთხმა მოიერიშე სუ-35-მა გააცილა.
რუსეთის სამხედრო-საჰაერო ძალებში სუ-35, სუ-57-ის შემდეგ, ყველაზე ახალი და რუსული რეალობიდან გამომდინარე, თანამედროვე ტექნოლოგიებით არის გამორჩეული.
სუ-35-ები, რომლებიც პრეზიდენტს აცილებდნენ, აღჭურვილი იყო Р-73 და Р-77 "ჰაერი-ჰაერი“ კლასის რაკეტებით. აღსანიშნავია, რომ მოიერიშეებით პრეზიდენტებს იშვიათად აცილებენ, თუმცა არსებობს ასეთი შემთხვევები და პუტინი არ არის ერთადერთი, რომელსაც ასეთი პატივით ან აცილებენ, ან ეგებებიან.
2021 წელს, ჟენევაში ვიზიტის დროს, აშშ-ის პრეზიდენტ ჯო ბაიდენის "ბორტ ნომერ ერთს“ შვეიცარიული გამანადგურებლები "პატივისცემის ნიშნად“ შეეგებნენ.
2017 წელს სამხედრო ავიაციამ პუტინის ლაინერი სირიიდან ეგვიპტის გზაზე გააცილა.
"არაბთა გაერთიანებული საამიროები და საუდის არაბეთი - უსაფრთხო ქვეყნები არიან, თუმცა ზოგადად, რთული და არაპროგნოზირებადი რეგიონია, ამიტომ, უსაფრთხოების უზრუნველყოფის ყველა ზომა იყო მიღებული“, - ახსნა კრემლის პრესსპიკერმა დმიტრი პესკოვმა.
შეტევის შემთხვევაში, თვითონ ბორტი ნ1 "ახშობს“ რაკეტებს და რადიო-ელექტრონული ბრძოლის მექანიზმებით მათ ირიდებს, ასევე გამოიყენება სითბური მახეები.
საბრძოლო თვითმფრინავებიც იმავეს აკეთებენ. გარდა ამისა, სუ-35 "საცეცხლე მეთოდებით“ გადაიტაცებენ რაკეტებს, ჩამოაგდებენ დრონებს, ან მოწინააღმდეგის გამანადგურებლებს.
საჭიროების შემთხვევაში, მათ საკუთარი თვითმფრინავის გადაფარებით შეუძლიათ დაიცვან ბორტი ნ1. ასევე, სუ-35-ები პრეზიდენტის თვითმფრინავს მოწინააღმდეგის გამანადგურებლებისგან იმ შემთხვევაშიც იცავენ, თუკი ისინი დაფრენას აიძულებენ, ან "აგრესიულად იმოქმედებენ სხვადასხვა მეთოდებით“.
აღსანიშნავია, რომ სამხედრო ავიაციის ფრენა იმ სახელმწიფოებთანაც იყო შეთანხმებული, რომლებზეც მარშრუტი გადიოდა. მათ კრემლს თანხმობა განუცხადეს, რისთვისაც რუსულმა მხარემ მადლობა გადაუხადა.