რუსთაველის გამზირზე ქვეყნის მთავარი ნაძვის ხე აინთო
თბილისის მერმა კახა კალაძემ რუსთაველის გამზირზე ქვეყნის მთავარი ნაძვის ხე აანთო. ანთებამდე კი სცენაზე პარლამენტის თავმჯდომარე შალვა პაპუაშვილი, "ქართული ოცნების" თავმჯდომარე ირაკლი კობახიძე და საპარლამენტო უმრავლესობის ერთ-ერთი ლიდერი მამუკა მდინარაძე მიიწვია, რომელთაც შეკრებილ საზოგადოებას მიმართეს.
ჯერ კიდე 15 ნოემბერს, დედაქალაქის მერმა კახა კალაძემ საზოგადოებას აცნობა, რომ წელს თბილისს საახალწლოდ ახალი ნაძვის ხე ექნებოდა. როგორც მან თბილისის მთავრობის სხდომაზე განაცხადა, მთავარი ნაძვის ხე 15 დეკემბერს აინთებოდა. როგორც ცნობილი გახდა, თბილისის მერიამ, ნაძვის ხის შესაძენად სატენდერო წინადადებების მიღება 11 ოქტომბერს დაიწყო. შესყიდვის მიწოდების ბოლო ვადად კი განსაზღვრული იყო 15 ნოემბერი. სატენდერო განაცხადის მიხედვით, ნაძვის ხის სიმაღლე 24 მეტრია. მას 365 ტოტი აქვს და 120 ცალი ფარდა ანათებს. ნაძვის ხე 100 აქსესუარით არის მორთული. მათ შორის არის: გრძივად აწყობილი ბურთები, კონტურული ვარსკვლავები და ფიფქები, კონტურული მოგრძო ფორმის სათამაშოები.
"თბილსერვის ჯგუფის“ მიერ ახალი ნაძვის ხის შესყიდვაზე ტენდერში წინადადებების მიღება 11 ოქტომბერს დაიწყო და 16 ოქტომბერს დასრულდა. შესყიდვის სავარაუდო ღირებულება იყო 730 000 ლარი. "თბილსერვისმა" შეთავაზება მხოლოდ შპს "ღამის შოუს სტუდიისგან" მიიღო. მან "თბილსერვისს" შესყიდვის სავარაუდო ღირებულებაზე - 730 000 ლარზე, 10 000 ლარით ნაკლები შესთავაზა. ხელშეკრულება სწორედ ამ კომპანიასთან გაფორმდა“, - ვკითხულობთ "თბილსერვის ჯგუფის“ მიერ გავრცელებულ ინფორმაციაში.
"ყველამ უნდა ჩავიფიქროთ სურვილები, რომ ხვალინდელი დღე იყოს კიდევ უფრო უკეთესი, გვქონდეს მშვიდობა, ეკონომიკური განვითარება, წინსვლა, ბედნიერება, დღეგრძელობა, რომ კეთილდღეობა იგრძნოს ამ ქვეყანაში მცხოვრებმა თითოეულმა ჩვენმა მოქალაქემ", - მიმართა დედაქალაქის მერმა კახა კალაძემ ნაძვის ხის ანთების ღონისძიებაზე შეკრებილებს.
დღესვე, დედაქალაქის ქუჩები საახალწლო ილუმინაციებით განათდა.
ასევე, ხვალ, 16 დეკემბერს ორბელიანის მოედანზე, მიმდებარე ქუჩებზე „საახალწლო სოფელი“ გაიხსნება.
ორბელიანის მოედანი და მიმდებარე ქუჩები, ასევე დედაენის ბაღში მოეწყობა „საახალწლო სოფელი“. დედაენის ბაღში პატარებს თოვლის ბაბუას სახლი, ელფების სახელოსნო და ატრაქციონების პარკი დახვდებათ.
"საახალწლო სოფელი“ 7 იანვარს, მუსიკალური საღამოთი დაიხურება.
რუსთაველზე კი ამჟამად იტალიელი მუსიკოსის სტეფანო სინიორინის და მისი ბენდის კონცერტი მიმდინარეობს.
იხილეთ ასევე: