15 წლის ასაკში იძულებით დააქორწინეს, იყო ძალადობის მსხვერპლი და... - სამირა საბზიანის ამბავი, რომელიც ირანში სიკვდილით დასაჯეს

ირანში სიკვდილით დასაჯეს სამირა საბზიანი, რომელიც გასული ათწლეულის განმავლობაში პატიმრობაში იყო ქმრის მკვლელობის ბრალდებით. ამის შესახებ ინფორმაცია გაავრცელა ნორვეგიაში დაფუძნებულმა ირანის ადამიანის უფლებათა დაცვის ჯგუფმა.

აღსანიშნავია, რომ ახალგაზრდა ქალი სიკვდილით დასაჯეს მას შემდეგ, რაც ირანში გაიზარდა შეშფოთება და პროტესტი სიკვდილით დასჯის შემთხვევების გამო.

ადამიანის უფლებათა დაცვის ორგანიზაციის ცნობით, საბზიანი 15 წლის ასაკში დააქორწინეს. მისი ოჯახის წევრების ცნობით, ის იყო ოჯახური ძალადობის მსხვერპლი. ქალი ახლა 30-წლამდე უნდა ყოფილიყო, ზუსტი ასაკი ცნობილი არ არის.

Amnesty International-ის განცხადებით, შემაშფოთებელია ირანიდან მიღებული ცნობები სიკვდილით დასჯის შესახებ. მათ განცხადებაში აღნიშნულია, რომ ორი შვილის დედა ბავშვობაში იძულებით დააქორწინეს.

გაეროს ადამიანის უფლებათა უმაღლესი კომისრის განცხადებით, ისინი შეშფოთებულები არიან სიკვდილით დასჯის გამო. "ჩვენ კიდევ ერთხელ მოვუწოდებთ ირანს, დააწესოს მორატორიუმი სიკვდილით დასჯაზე“, - დასძინა მან.

აღსანიშნავია, რომ სიკვდილით დასჯის შესახებ ინფორმაცია ირანულ მედიაში ჯერჯერობით არ გავრცელებულა.

საბზიანი დაახლოებით ათი წლის წინ დააკავეს. ქმრის მკვლელობის ბრალდებით. მაშინ ის 19 წლის იყო. ირანის სასამართლომ მას სიკვდილით დასჯა მიუსაჯა. მას ჰყავდა ორი შვილი, რომლებიც დაკავების შემდეგ არ უნახავს. შვილები ქალმა ამ თვის დასაწყისში ნახა - ეს იყო მათი ერთადერთი და ბოლო შეხვედრა ციხეში.

ავტორი: ანრი კურტანიძე