დევიდ კოზაკის სახლში ჩანაწერები იპოვეს - რა დეტალები გახდა ცნობილი ჩანაწერებიდან თავდამსხმელზე, რომელმაც კარლის უნივერსიტეტში 14 ადამიანი მოკლა
ჩეხეთის პოლიციის ინფორმაციით, კარლის უნივერსიტეტზე თავდამსხმელის, დევიდ კოზაკის სახლში ჩანაწერები იპოვეს, სადაც ის კიდევ ორი ადამიანის მკვლელობას აღიარებს - საქმე ეხება 15 დეკემბერს, კლანოვიცის ტყეში მოკლულ 32 წლის მამაკაცსა და მის 2 თვის ქალიშვილს. პოლიციამ განაცხადა, რომ კოზაკი პოტენციურ ეჭვმიტანილთა სიაშიც იყო, თუმცა მისი დაკითხვა ვერ მოხერხდა.
- შეგახსენებთ, რომ 24 წლის მამაკაცი კარლის უნივერსიტეტის სტუდენტი იყო, კანონიერად ფლობდა იარაღს და უნივერსიტეტზე თავდასხმის დღეს საკუთარი მამაც მოკლა.
უნივერსიტეტში მომხდარი სროლის შედეგად 14 ადამიანი დაიღუპა, დაშავდა - 25, მათ შორის უცხოეთის სამი მოქალაქე, კერძოდ, ორი - არაბთა გაერთიანებული საამიროებიდან და ერთი ნიდერლანდებიდან. გარდაცვლილია თავად თავდამსხმელიც - მან თავი მოიკლა.
ჩეხეთის შინაგან საქმეთა მინისტრმა ვიტ რაკუსანმა მოუწოდა ყველა ქალაქისა და სოფლის მერს, გააუქმონ საახალწლო ფეიერვერკი. მისი თქმით, მომხდარი ტრაგედიის ფონზე, ჩეხეთმა დღესასწაული მშვიდად უნდა აღნიშნოს.
ცნობისთვის, ეს შემთხვევა ჩეხეთის რესპუბლიკის ისტორიაში ყველაზე მასობრივი სროლაა. თავდასხმას, ამ საუკუნეში, ევროპაში ერთ-ერთი ყველაზე დიდი დაღუპვის მაჩვენებელი აქვს.