"ეს ნამდვილი სასწაულია" - იაპონიაში, დამანგრეველი მიწისძვრიდან 5 დღის შემდეგ, ნანგრევებში 90 წლის ქალი ცოცხალი იპოვეს
იაპონიაში მომხდარი დამანგრეველი მიწისძვრიდან ხუთი დღის შემდეგ, ნანგრევებში ცოცხალი იპოვეს 90 წელს გადაცილებული ქალი.
მაშველებმა ის ქალაქ სუზუში, ორსართულიანი შენობის ნანგრევებში იპოვეს.
- 7,5 მაგნიტუდის სიმძლავრის მიწისძვრას იაპონიაში, ბოლო მონაცემებით, 120 ადამიანი ემსხვერპლა, ხოლო 200 ამ დრომდე დაკარგულად ითვლება.
იაპონური მედიის ინფორმაციით, როდესაც მიიღეს ინფორმაცია, რომ შენობის ნანგრევებში ორი ქალი შესაძლოა, ცოცხალი ყოფილიყო, სამაშველო სამუშაოებში იმ ადგილას 100 მაშველი ჩაერთო.
პოლიციის ცნობით, ქალი ცოცხალი იყო, თუმცა ჰიპოთერმია აღენიშნებოდა. ამავე ადგილას მაშველებმა იპოვეს 40 წლამდე ასაკის ქალი, რომელიც გარდაცვლილი იყო.
"ეს ნამდვილი სასწაულია", - ამბობენ მედიკოსები.