"ვნახეთ მორიგი მკრეხელური გამოვლინება და კიდევ ერთი იერიში ჩვენს დედა ეკლესიაზე - საზოგადოებამ ამ ადამიანებს თავად გასცა პასუხი" - გიორგი ამილახვარი
ვნახეთ მორიგი მკრეხელური გამოვლინება და კიდევ ერთი იერიში ჩვენს დედა ეკლესიაზე - საზოგადოებამ ამ ადამიანებს თავად გასცა პასუხი, - ამის შესახებ საქართველოს განათლების მინისტრმა, გიორგი ამილახვარმა განაცხადა.
მისივე თქმით, საზოგადოება ბრძენია და ყველაფერს ხედავს.
“დიდი ხანია ეს ადამიანები მსგავსი ტიპის იერიშს ახორციელებენ ქართულ სახელმწიფოზე, ქართულ ეკლესიაზე, რა არის მათი მოტივები, რა არის მათი მიზნები და საფუძვლები... მორიგი მსგავსი მკრეხელური გამოვლინება ვნახეთ და კიდევ ერთი იერიში ჩვენს დედა ეკლესიაზე, რომელსაც განურჩეველი როლი და ისტორია აქვს საქართველოს ისტორიაში. საზოგადოება არის ბრძენი და საზოგადოება ყველაფერს ხედავს. რომ არა ჩვენი პოლიტიკოსების და ხელისუფლების შეფასებაც კი, თქვენ ხედავთ, რომ საზოგადოებამ ამ ადამიანებს თავად გასცა პასუხი და უპასუხა იმ მკრეხელობაზე, ძალიან არაბუნებრივ, არაკეთილმოსურნე ზრახვებზე, რომელიც ამის უკან არის ამოფარებული”, - განაცხადა ამილახვარმა.
ინფორმაციისთვის, აქტივისტმა ნატა ფერაძემ საღებავი შეასხა სამების საკათედრო ტაძარში განთავსებულ წმინდა მატრონა მოსკოველის ხატს, რომელზეც იოსებ სტალინიც არის გამოსახული.