ტრაგედია ინდოეთში - სკოლის პიკნიკზე მიმავალი ნავი ჩაიძირა, რის შედეგადაც 12 მოსწავლე და 2 მასწავლებელი დაიღუპა
სულ მცირე 12 მოსწავლე და ორი მასწავლებელი დაიხრჩო დასავლეთ ინდოეთში, სკოლის პიკნიკზე მიმავალი ნავის ჩაძირვის შედეგად. ინფორმაციას BBC ავრცელებს.
ადგილობრივმა პოლიციამ დაღუპულთა რაოდენობა დაუდასტურა და განაცხადა, რომ სამაშველო ოპერაცია ჯერ კიდევ გრძელდება.
- ჰარნის ტბაზე, ვადოდარაში, გუჯარატის შტატში მომხდარი ტრაგედიის მიზეზი ჯერჯერობით უცნობია, თუმცა როგროც Reuters-ი იტყობინება, მგზავრებს სამაშველო ჟილეტები არ ეცვათ.
ადგილობრივი ხელისუფლების ცნობით, გემზე 27 ადამიანი იმყოფებოდა.
პოლიციის კომისარმა ანუპამ სინგ გეჰლოტმა BBC-ს განუცხადა, რომ შვიდი ადამიანი გადაარჩინეს და ისინი მკურნალობას ახლომდებარე საავადმყოფოში გადიან.
გუჯარატის მთავარმა მინისტრმა ბუპენდრა პატელმა განაცხადა, რომ შტატის მთავრობა 400,000 რუპიას (4,800 აშშ დოლარი) დაღუპულთა ოჯახებს გადასცემს და 50,000 რუპიას (600 აშშ დოლარი) დაშავებულთა ოჯახებს.
- ნავების ჩაძირვის შედეგად მომხდარი ტრაგიკული ინციდენტები ინდოეთისთვის უცხო არ არის.
გასულ წელს ინდოეთის სამხრეთ კერალას შტატში ნავის ჩაძირვას 22 ადამიანი ემსხვერპლა.