Dior-ის ჩანთამ შესაძლოა, სამხრეთ კორეის პრეზიდენტის ბედი გადაწყვიტოს - ქვეყნის პირველი ლედის ძვირადღირებული სურვილები და ჩანთა, როგორც "პოლიტიკური მოთამაშე"

მედიაში გავრცელდა ვიდეო კადრები, სადაც ჩანს, თუ როგორ ჩუქნის სასულიერო პირი სამხრეთ კორეის პირველ ლედის Dior-ის ძვირადღირებულ ჩანთას. არსებული ინფორმაციით, ვიდეო გასული წლის მიწურულს სასულიერო პირმა თვითონვე გადაიღო ფარული ვიდეოკამერით.

ჩანთის ღირებულება 3 მილიონ ვონს შეადგენს (2200$).

• სამხრეთ კორეის კანონმდებლობით, საჯარო მოხელეების და მათი მეუღლეების მიერ 1 მილიონ ვონზე მეტი ღირებულების საჩუქრების მიღება უკანონობად ითვლება.

ზოგიერთი ანალიტიკოსის თქმით, სკანდალი საფრთხეს უქმნის პრეზიდენტის იმიჯს მომავალი არჩევნების წინ. არჩევნები კი მიმდინარე წლის აპრილში უნდა გაიმართოს.

კორეული მედია იტყობინება, რომ პრეზიდენტის ოფისმა ჩანთის მიღება დაადასტურა და განაცხადა, რომ ის "ინახება, როგორც მთავრობის საკუთრება".

ბოლოდროინდელმა გამოკითხვამ აჩვენა, რომ ქვეყნის ამომრჩეველთა 69% პრეზიდენტის მეუღლისგან ახსნა-განმარტებას ითხოვს. ადრინდელი კვლევის თანახმად, გამოკითხულთა 53% თვლიდა, რომ მისი ქცევა შეუსაბამო იყო.

ამ თვის დასაწყისში, პრეზიდენტმა ვეტო დაადო კანონპროექტს, რომელიც მისი მეუღლის წინააღმდეგ გამოძიების დაწყებას ითხოვდა.