ისრაელმა ღაზის სამხრეთით მდებარე ქალაქ რაფაჰზე შტურმის ზუსტი თარიღი დაასახელა - "თუ ჩვენი მძევლები რამადანისთვის შინ არ დაბრუნდებიან, ბრძოლა ყველგან გაგრძელდება"
ისრაელმა რაფაჰზე თავდასხმის კონკრეტული თარიღი დაასახელა - ომის კაბინეტის წევრის ბენი განცის განცხადებით, თუ "ჰამასი" მძევლებს არ გაათავისუფლებს, რაფაჰზე შტურმი 10 მარტს დაიწყება.
ისრაელმა პირველად დაასახელა ღაზის სამხრეთით მდებარე ქალაქში ოპერაციის დაწყების კონკრეტული თარიღი, რომელსაც ომის დაწყებიდან მოყოლებული, დაახლოებით, 1,5 მილიონმა პალესტინელმა შეაფარა თავი.
"მსოფლიომ უნდა იცოდეს, რომ თუ ჩვენი მძევლები რამადანისთვის სახლში არ დაბრუნდებიან, ბრძოლა ყველგან გაგრძელდება, მათ შორის რაფაჰშიც", - აღნიშნა განცმა და დასძინა, რომ ისრაელი იმოქმედებს "კოორდინირებულად, რათა ხელი შეუწყოს მშვიდობიანი მოსახლეობის ევაკუაციას და მინიმუმამდე დაიყვანოს მსხვერპლი".
საერთაშორისო ზეწოლის მიუხედავად, ისრაელის პრემიერ-მინისტრმა ბენიამინ ნეთანიაჰუმ პირობა დადო, რომ "ჰამასის" განადგურების მიზნით, რაფაჰზე სახმელეთო თავდასხმას ნებისმიერ შემთხვევაში დაიწყებს.
რამადანის დაწყებამდე სულ რაღაც სამი კვირა დარჩა. გავრცელებული ინფორმაციით, რაფაჰის მოსახლეობამ ქალაქის დატოვება უკვე დაიწყო. BBC-ის დიპლომატიური კორესპონდენტის პოლ ადამსის თქმით, ზოგიერთი პალესტინელი თავშესაფრის პოვნას ეგვიპტეში ცდილობს.
ღაზაში არსებული საბრძოლო ვითარების მიუხედავად, ბოლო დღეებია კაიროში მიმდინარეობს მოლაპარაკებები ისრაელსა და "ჰამასს" შორის ცეცხლის შეწყვეტის თემაზე, თუმცა როგორც აღნიშნავენ, შედეგი "არც ისე პერსპექტიულია".
შეგახსენებთ, მას შემდეგ, რაც 7 ოქტომბერს "ჰამასის“ მებრძოლები შევიდნენ სამხრეთ ისრაელში და სასტიკად მოკლეს ათასზე მეტი მშვიდობიანი მოქალაქე, ქვეყნის მთავრობამ გამოაცხადა, რომ ომს უცხადებდა "ჰამასს“, საჰაერო და საარტილერიო შეტევების შემდეგ დაიწყო სახმელეთო ოპერაცია ღაზის სექტორში "ჰამასის" მებრძოლთა გასანადგურებლად და მძევლების გასათავისუფლებლად.
ცნობისთვის, პალესტინის ჯანდაცვის სამინისტროს განცხადებით, ომის დაწყების შემდეგ, ღაზაში 28 400-ზე მეტი ადამიანი დაიღუპა და 68 000-ზე მეტი კი დაშავდა.
- რაფაჰი - ქალაქი ღაზის სექტორის სამხრეთით, ეგვიპტის საზღვარზე. მისი ნაწილი ეგვიპტეში მდებარეობს. ამჟამად ქალაქში მილიონზე მეტი ადამიანია, მათგან დიდი ნაწილი ღაზის ჩრდილოეთ ნაწილიდან არის ლტოლვილი. ისრაელი მიიჩნევს, რომ რაფაჰზე შტურმისა და ქალაქის გაწმენდის გარეშე, შეუძლებელი იქნება ღაზის სექტორის კონტროლი და "ჰამასის" სრული ლიკვიდაცია. თუმცა რაფაზე თავდასხმამ და მოსალოდნელმა უზარმაზარმა სამოქალაქო მსხვერპლმა შეიძლება გამოიწვიოს არაპროგნოზირებადი მკაცრი რეაქცია იმ არაბული ქვეყნებიდანაც კი, რომლებიც აქამდე შედარებით ზომიერ პოზიციას იკავებდნენ ისრაელის მიმართ.
იხილეთ ასევე: