ხანძარი ვალენსიის 14-სართულიან საცხოვრებელ კორპუსში - დაიღუპა 4 ადამიანი, 15 კი დაკარგულად ითვლება: უმძიმესი კადრები ადგილიდან
აღმოსავლეთ ესპანეთის ქალაქ ვალენსიაში 14-სართულიან საცხოვრებელ კორპუსს ხანძარი გაუჩნდა - შემთხვევის შედეგად 4 ადამიანი დაღუპა, 15 კი ამ დრომდე დაკარგულად ითვლება. დაშავებულია 15 ადამიანი, მათ შორის ექვსი მეხანძრე და ერთი მცირეწლოვანი ბავშვი, თუმცა მათ სიცოცხლეს საფრთხე არ ემუქრება.
- შენობა 138 აპარტამენტისგან შედგებოდა და მასში 450 მოსახლე ცხოვრობდა. ცეცხლს 20-ზე მეტი სახანძრო ეკიპაჟი ებრძოდა, თუმცა ძლიერი ქარი მის ლოკალიზებას ხელს უშლიდა.
ვალენსიის მერის, მარია ხოსე კატალას განცხადებით, 15 ადამიანი უგზო-უკვლოდ დაკარგულად ითვლება. ხელისუფლება მათ პოვნას ამ დრომდე ცდილობს. ადგილობრივების ინფორმაციით, მეხანძრეებმა ამწეების გამოყენებით გადაარჩინეს რამდენიმე მცხოვრები.
როგორც ამბობენ, ხანძარი თავდაპირველად მე-4 სართულზე გაჩნდა და მთელს შენობას მოედო. ვარაუდობენ, რომ ცეცხლის სწრაფ გავრცელებას ხელი შენობის ფასადმაც შეუწყო.
ესთერ პუჩადესმა, ვალენსიის სამრეწველო ტექნიკური ინჟინრების კოლეჯის ვიცე-პრეზიდენტმა ჟურნალისტებთან საუბრისას განაცხადა, რომ შენობის ექსტერიერზე პოლიურეთანის მასალა იყო გამოყენებული, რაც სწრაფად აალებადობით გამოირჩევა.
ამბავს ესპანეთის პრემიერ-მინისტრი პედრო სანჩესიც გამოეხმაურა:
"შეძრწუნებული ვარ ვალენსიაში გაჩენილი საშინელი ხანძრის გამო... მინდა ჩემი სოლიდარობა გამოვუცხადო ყველა დაზარალებულ ადამიანს და მადლობა გადავუხადო სასწრაფო დახმარების პერსონალს, რომელიც ამ დრომდე შემთხვევის ადგილზე მუშაობს" - ნათქვამია განცხადებაში.