ინგლისში მეორე მსოფლიო ომის დროინდელი ბომბი იპოვეს: ქალაქიდან მოსახლეობის ევაკუაცია განხორციელდა - რას წერს ადგილობრივი მედია
ინგლისში ათასობით ადამიანის ევაკუაცია განხორციელდა, მას შემდეგ, რაც პლიმუთში მეორე მსოფლიო ომის დროინდელი აუფეთქებელი ბომბი აღმოაჩინეს. პოლიციის განცხადებით, ბომბი სამშაბათს, წმინდა მაიკლის გამზირზე მდებარე ბაღში იპოვეს. შედეგად, 3,250 ადამიანის ევაკუაცია განხორციელდა.
გაერთიანებული სამეფოს თავდაცვის სამინისტრომ განაცხადა, რომ შეიარაღებული ძალების 30-მდე გამოცდილი სპეციალისტი ბომბის მდგომარეობის შესაფასებლად მუშაობდა. საქალაქო საბჭოს თქმით, "ძალიან რთული სიტუაცია შეიქმნა".
- საბოლოოდ, ბომბი ზღვაში გაიტანეს და დევონის სანაპიროსთან, 14 მეტრის სიღრმეში ააფეთქეს. ოპერაციაში ათასზე მეტი ოფიცერი იყო ჩართული.
თავდაცვის მინისტრის მდივანმა გრანტ შაპსმა აღნიშნა "უაღრესად რთულ ოპერაციაში" ჩართული პირების "სიმამაცე და სიმტკიცე" და საზოგადოების წევრების "მოთმინება და თანამშრომლობა". პარასკევს გაკეთებულ განცხადებაში მან თქვა:
”მინდა მადლობა გადავუხადო ჩვენს მთელ პერსონალს... ვინც ამ კვირაში მუშაობდა, რათა შეენარჩუნებინა საზოგადოების უსაფრთხოება და მინიმუმამდე დაეყვანა ზიანის რისკი. ამ ოპერაციის წარმატება მოწმობს ჩვენი შეიარაღებული ძალების ოსტატობისა და გამოცდილების დონეს, ისევე როგორც ჩვენი პერსონალის სიმამაცეს და სიმტკიცეს" - ნათქვამია განცხადებაში.
- ქალაქის მუზეუმის თანამშრომლებს თქმით, ბომბი გერმანელებმა 1941 წლის 22 ან 23 აპრილს ჩამოაგდეს. აღსანიშნავია, რომ მეორე მსოფლიო ომის პერიოდში ტერიტორიაზე 1362 ბომბი აფეთქდა.