როგორ ცხოვრობს ეკრანებიდან 11 წლის წინ გაუჩინარებული სალიტა ჩუბინიძე - ერთ დროს პოპულარული გოგონას დღევანდელობა ცნობილ მეუღლესთან ერთად
მშვენიერი გარეგნობის, ნიჭიერი გოგონა სალიტა ჩუბინიძე 11 წლის წინ იუმორისტული შოუდან გაიცნეს. მრავალმხრივიად საინტერესო სალიტა პოპულარული მალევე გახდა. მაყურებელმა შეიყვარა... ცოტა ხანში ოჯახიც შექმნა, მისი მეუღლე იმხანად იუმორისტი (იმავე შოუდან) და უმეტესად, პრეზიდენტ სააკაშვილის პაროდისტი გიორგი აფციაურია, რომელმაც სალიტას ხელი სთხოვა.
დაქორწინების შემდეგ წყვილი ტელეეკრანიდან მალევე გაქრა. რას საქმიანობს, დროს რას უთმობს, რით არის დაკავებული სალიტა ჩუბინიძე დღეს, რომლის ვიდეოც ცოტა ხნის წინ "ტიკ-ტოკზეც" გამოჩნდა და დიდი გამოხმაურება გამოიწვია. ამ ყველაფერზე პასუხს მისი ინტერვიუდან შეიტყობთ.
- ჩემი დღევანდელი საქმიანობა მაინც დედობაა, ოჯახი, დროს ამას ვუთმობ, მაგრამ ვცდილობ, საკუთარი თავისთვისაც მოვიცალო. განვითარებაზე მუდმივად ვზრუნავ და ამ 11-12 წლის განმავლობაში არ გავჩერებულვარ, ორი უნივერსიტეტი დავამთავრე. ხელოვნებათმცოდნეობას "ჯავახიშვილში" ვსწავლობდი და კონსერვატორიაში მუსიკის ტექნოლოგიის ფაკულტეტი დავასრულე. ესაა თანამედროვე ტექნოლოგიები მუსიკაში, რაც შედარებით ახალი ფაკულტეტია, როგორც კი კონსერვატორიაში ის დაამატეს, მაშინვე ჩავაბარე. სულ მინდოდა მუსიკალური კუთხით მეტი განათლება მქონოდა. ასევე უფროსი მასწავლებელიც გავხდი, ანუ უფროსი მასწავლებლის სტატუსი მოვიპოვე და შემიძლია ხელოვნებათმცოდნეობა ვასწავლო.
- მუსიკა ვახსენეთ და როგორც ვიცი, კარგად მღერი...
- ბავშვობიდან ვმღერი და აქტიური ვარ ამ სფეროში... გარდა ამისა, უამრავი ჰობი მაქვს, ჯერ ვტკბები ამ ყველაფრით და მათ სერიოზულად არ ვუდგები. ერთ-ერთი ყველაზე საყვარელი გატაცებაა მინიატურული ხელოვნება. ამ მხრივ უნდა ვიაქტიურო, რადგან საქართველოში, როგორც ვხვდები, მსგავს ხელოვნებასთან წვდომა ადამიანებს აქტიურად არ აქვთ. არადა, ძალიან საინტერესო და სასიამოვნო დარგია. თავადაც ვქმნი, კერამიკული ხელოვნებითაც ვარ გატაცებული, მიზიდავს პოლიმერული თიხა და ეს ორივე დარგი შესწავლილი მაქვს. მხოლოდ ერთი მიმართულებით განვითარებას არ ვაპირებ და ამით თავის შეზღუდვას, რასაც ვაკეთებდი აქამდე, აუცილებლად წარმოვაჩენ.
- "ადამიანი-ანსამბლი" გამოდიხართ...
- ასე გამოდის... როდესაც ერთი მიმართულებით აქტიურობ, შედეგი მალევე მოდის. ამ შემთხვევაში, ბევრ რაღაცას რომ მოედები, დროში იწელება და შედეგი გვიან დგება... წარმოიდგინეთ, ახლა ვიზაჟითაც დავინტერესდი, ისე, ეს სფეროც ყოველთვის მაინტერესებდა. ჩემმა ახლობლებმა, მეგობრებმა მითხრეს, რომ კარგად გამოგდისო და ცოტა გავთამამდი.
- როგორც ჩანს, ხატავთ კიდეც?
- კი, ვხატავ, მაგრამ ჩემთვის ყველაზე საყვარელი საქმე მაინც სიმღერა და სცენაზე დგომაა. ამ კუთხითაც რაღაცებს ვაპირებ. მიმაჩნია, რომ რითაც ხარ სამყაროსგან, ღმერთისგან დაჯილდოებული, ის უნდა განავითარო. უარი არ უნდა თქვა, რადგანაც უმადურობა გამოდის. ამა თუ იმ ნიჭით როცა იბადები, გასაქანი უნარებს აუცილებლად უნდა მისცე. მით უმეტეს, რომ ყოველთვის პოზიტიური გამოხმაურება აქვს ხოლმე სცენაზე, ვთქვათ, ჩემს გამოსვლას, სიმღერას. თბილი დამოკიდებულება აქვს ყოველთვის მაყურებელს. არ მაქვს უფლება, ჩემსას არ ვეცადო...
- "თქვენი შოუ" იუმორისტული პროექტი, სადაც გამოჩნდით საოცარი ხმით, გარეგნობით და ყურადღება მიიქციეთ. პოპულარობაც მალე მოვიდა. დღემდე მოგყვებათ ის წლები?
- ერთი წელი ნებისმიერ ქვეყანაში ძალიან მცირე დროა იმისთვის, რომ თავი დაიმკვიდრო, მით უმეტეს, საქართველოში. მიუხედავად იმ ერთი წლისა, ყოველთვის ყველგან მაინც მცნობენ, ძალიან დიდ სითბოს და ყურადღებას გამოხატავენ. ამ დროის მანძილზე თითქმის არ ყოფილა შემთხვევა, რომ ვინმეს ვერ ვეცანი. როგორც ირკვევა, ის ერთი წელი ამ კუთხით საოცარი ნახტომი აღმოჩნდა. თუმცა მიუხედავად ამისა, ვფიქრობდი, რომ ყველაფრის ნულიდან დაწყება მომიწევდა, რადგანაც სურვილი გამიჩნდა, რომ საკუთარი თავი წარმოვაჩინო. მოკლედ, მეგონა, ნულიდან ვიწყებდი, მაგრამ მეგობრის მიერ ჩემთვის გადაღებულმა ვიდეომ და შემდეგ "ტიკ-ტოკზე" ატვირთულმა, ისეთი ემოციები გამოიწვია და ისეთი გამოხმაურება მოჰყვა, რომ ყველანაირ მოლოდინს გადააჭარბა. ვერ ვიჯერებდი...
- რა ვიდეოზეა საუბარი?
- გადაღება იყო, ჩემი გაკეთებული გვირგვინი და საყურეები, ბეჭედი მეკეთა. მინდოდა, გადამეღო. მეგონა, ფოტოგადაღება იყო და ვიდეო გადაუღია. თან, მაშინვე "ტიკ-ტოკზე“ ატვირთა. აღმოჩნდა, რომ ვიდეო "გავარდა" და ძალიან პოზიტიური გამოხმაურება მოჰყვა. კომენტარები, რაც წავიკითხე, მათში ერთი ვერ ვიპოვე ისეთი, რომ ვინმესგან დაგიცვა ან გამოგესარჩლოო - მეგობარმა მითხრა. გამიხარდა ძალიან. ამისთვის მადლობელი ვარ.
- ალბათ გწერდნენ, რომ გააქტიურდითო...
- როგორც წესი, ადამიანები თვითონ ცდილობენ თავის დამკვიდრებას და აქ პირიქითაა, მოთხოვნაა, რომ გავაქტიურდე და რატომაც არ უნდა დავაკმაყოფილო მათი მოთხოვნა. ამ შემთხვევაში არის სურვილი და მეც თავს მხოლოდ ერთი კუთხით არ შევიზღუდავ. რაც აქამდე მისწავლია, გამიკეთებია, შემისწავლია, ყველაფერს საინტერესოდ მივაწოდებ მაყურებელს - ბევრი მიმართულება იქნება.
- იუმორისტულ შოუში მხიარულთა და საზრიანთა გუნდიდან აღმოჩნდით, იუმორი უცხო არ არის თქვენთვის, ამ კუთხით არ ფიქრობთ გააქტიურებას?
- რატომაც არა, ადამიანი ღია უნდა იყოს ნებისმიერი სიახლის მიმართ. თუკი იქნება მსგავსი შემოთავაზება, ან რაღაც პროექტი, არც ამაზე ვიტყვი უარს... ზოგადად, იუმორს რაც შეეხება, სკოლის მოსწავლე ვიყავი, ჩემი სკოლის "კავეენის" გუნდის კაპიტანი რომ ვიყავი. საჩხერეში მთელი იმერეთის მასშტაბით ჩემპიონები გავხდით. იქიდან მოყოლებული ამ სფეროთი დავინტერესდი, ვიფიქრე, აქ აქტიურობა უინტერესო არ უნდა იყოს-მეთქი და მერე „თსუ“-ს კავეენში აღმოვჩნდი. იქიდან კი უკვე "რუსთავი 2“-ზე.
- ტელევიზიიდან ამ მიმართულების შოუებიდან არ ყოფილა შემოთავაზება?
- ყოფილა, მაგრამ ჩემი გადაწყვეტილება იყო, ძირითადი დრო ბავშვებისთვის დამეთმო. აქამდე ძალიან პატარები იყვნენ და მინდოდა, მათ გვერდით ვყოფილიყავი. ახლა ცოტა წამოიზარდნენ და შემიძლია, ცოტა ვდისტანცირდე.
- თუკი ეთერში ხელის თხოვნას გავიხსენებთ, რა იყო ეს თქვენს ცხოვრებაში?
- რეალურად გიორგისგან ხელის თხოვნა იყო კონცერტზე, ბორჯომში. გადაცემის ამბავი კი ასე იყო - ერთმა ადამიანმა დაიწყო ლექსის კითხვა, იმ ლექსზე გული ამიჩუყდა, მერე ბიჭები ყვავილებით რომ დავინახე, მეგონა, რომ უბრალოდ ეს მათგან ჩემი მხარდაჭერა, სიურპრიზი იყო, მაგრამ ბოლოს აღმოჩნდა, რომ გიორგიმ ხელი მთხოვა.
- უკვე რამდენი ხნია ოჯახი გაქვთ?
- თერთმეტი წელია. გიორგისთვის ოჯახი ყველაფერია, სრულიად მისი სივრცეა. ბავშვებთან ურთიერთობა მისთვის უდიდესი ბედნიერებაა. მზრუნველი და ყურადღებიანი მამაა.
- გიორგიც აღარ ჩანს ტელევიზიით. რას საქმიანობს?
- გიორგი აკადემიურ სფეროშია, ლექტორია სხვადასხვა უნივერსიტეტში და ძირითადად ამ საქმიანობით შემოიფარგლება.
- მისი ცნობილი პაროდია მიძინებულია?
- ამ ეტაპზე აღმოჩნდა, რომ კი.
- ბავშვებიც გაგვაცანით?
- უფროსი გაბრიელი 10 წლის არის, უმცროსი გოგონა, ალექსანდრა - 5 წლის. გაბრიელი ძალიან ნიჭიერია. პერიოდულად უცნაურ და სხვადასხვა ნიჭს ავლენს. საკმაოდ დამოუკიდებელი ბავშვია. ძალიან ჭკვიანია, მოწინავე მოსწავლეა. მისი პროექტები და გაკეთებული ანიმაციები ძალიან პოპულარულია. შემეცნებითი ანიმაციები აქვს, მაგალითად, არგონავტებზე და სხვადასხვა მითზე აკეთებს სასკოლო პროექტებში ანიმაციებს. ძალიან აქტიურია. გოგონა არის უსაყვარლესი, ჯერჯერობით პროექტებზე ვერ მუშაობს (ღიმილით), მაგრამ ეს პატარა ადამიანი იმხელა სითბოს და სიყვარულს ასხივებს, უდიდესი საჩუქარია ჩემთვის. ჩემზე ძალიან არის დამოკიდებული, სულ ერთად ვართ. თვალს როგორც მოვშორდები, მაშინვე დედიკოს ეძებს.
- ის პოპულარობა რომ არ მოსულიყო, რაც მაშინ თქვენს ცხოვრებაში მოვიდა, რა იქნებოდა დღეს?
- ჩემი აზრით „კავეენი“ და იუმორის სფერო რომ არ ყოფილიყო, მაინც ვეცდებოდი და ვცდილობდი, ჩემი თავი მხოლოდ სიმღერის კუთხით წარმომეჩინა. სცენისკენ მივიწევდი. ვერ გავჩერდებოდი, არ არსებობს, მუსიკას ჩემთვის მშვიდად და წყნარად ჩაევლო. არასდროს გავჩერებულვარ, ბავშვობიდან სცენაზე ვიდექი. უამრავი ჯილდო მაქვს, ბევრ კონკურსზე გავსულვარ, კარგი შედეგით. ეს ყველაფერი კი მერე ამბიციას გიჩენს, მეტი შესაძლებლობები გამოავლინო. რომელიმე პროექტში მაინც მოვხვდებოდი, თუ პროექტში არა, ჯგუფი მყავდა. როკჯგუფი და ჩვენ მაინც გავაკეთებდით რამეს. ყოველ შემთხვევაში, თუ იუმორი არ იქნებოდა, ამ მხრივ მაინც დავიმკვიდრებდი თავს. ვეცდები, ახლა სოციალურ ქსელებში ვიაქტიურო.
მადლობა, რომ გამომეხმაურეთ. 12 წლის მერე რომ გაგახსენდებათ ადამიანი, მადლობა უნდა უთხრა, აბა, რა უნდა ქნა?!. თქვენც და საზოგადოებას გიხდით მადლობას. მადლობა, ვისაც ერთხელ მაინც გავხსენებივარ, ინტერესი გამოუჩენია, მიუხედავად იმისა, რომ არ მიაქტიურია, არსად გამოვჩენილვარ, ბევრი მწერს, რომ ხშირად გამხსენებიხარ, მიფიქრია, ნეტავ, სად არის, რას აკეთებსო? ახლა ამ ყველაფერმა იმხელა სტიმული მომცა ცხოვრებაში. აუცილებლად ყველას დაუბრუნდება ეს ძალიან პოზიტიურად.