"მოდით, დავხუროთ საზღვრები..." - რა რეაქციები მოჰყვა ბაიდენის ადმინისტრაციის განცხადებას, სადაც მიგრანტებს "ახალჩამოსულები" უწოდეს
ჯო ბაიდენმა კონგრესის წარმომადგენლებისა და კონსერვატიული კომენტატორების კრიტიკა დაიმსახურა მას შემდეგ, რაც მისმა ადმინისტრაციამ ემიგრანტებს "ახალჩამოსულები" უწოდა.
ფაქტების ფურცელში, რომელიც თეთრი სახლის პრესსამსახურმა ორპარტიული სასაზღვრო შეთანხმების ადვოკატირებისთვის გაავრცელა, აღნიშნულია, რომ აშშ-ის მთავრობა გამოყოფს 1,4 მილიარდ დოლარს იმ "ქალაქებისთვის, რომლებიც კრიტიკულ მომსახურებას უწევენ ახალჩამოსულებს“.
რესპუბლიკელთა სახლის ოფიციალურ ანგარიშ X-ზე ნათქვამია, რომ "ბაიდენის თეთრი სახლი არალეგალურ ემიგრანტებს "ახალჩამოსულებს“ უწოდებს, მათივე თქმით, პრეზიდენტი არ აპირებს შეაჩეროს არალეგალური იმიგრაცია შეერთებულ შტატებში. "ეს კატასტროფაა" - ვკითხულობთ განცხადებაში.
პოსტს ბევრი საჯარო ფიგურა გამოეხმაურა:
"ჩვენ მოწმენი ვართ ერის დაგეგმილი და კონტროლირებადი განადგურების ჩვენივე ლიდერების ხელით", - წერს NCAA-ს ყოფილი მოცურავე და ქალთა სპორტის აქტივისტი რაილი გეინსი.
"არალეგალური ემიგრანტებიდან დაწყებული, "ახალჩამოსულებით“ დამთავრებული - ეს ყველაფერი არის შემოჭრის ნორმალიზების მცდელობა“, - წერს რადიო წამყვანი ლიზა ბუტი.
თეთრი სახლის ხელმძღვანელობა კონგრესის ბევრმა წარმომადგენელმა და პოლიტიკურმა მოღვაწემ გააკრიტიკა:
"არალეგალური – კანონით აკრძალულია. "ALIEN" - ტერმინოლოგია აშშ-ს კოდექსში - აღწერს ადამიანს, რომელიც არ არის შეერთებული შტატების მოქალაქე", - წერს ბაირონ დონალდსი - "თუ ადამიანი შეერთებულ შტატებში უკანონოდ შემოდის, ის არალეგალურად ითვლება".
"ახალჩამოსულები? არალეგალების წყალდიდობა არღვევს შეერთებული შტატების კანონებს. ვიცით, რომ ბევრი მათგანი ცნობილი ტერორისტია", - წერს პარლამენტარი რობერტ ადერჰოლტი - "მოდით, დავხუროთ საზღვრები და აღვასრულოთ ქვეყნის კანონები. ბაიდენი სერიოზულად არ არის განწყობილი საზღვარზე არსებული კრიზისის მიმართ."