ქერჩის ხიდის აფეთქების საიდუმლო გეგმა? - გერმანელი ოფიცრების რა ჩანაწერი მოიპოვეს რუსებმა და რას აცხადებენ გერმანიის თავდაცვის უწყებაში
გერმანიის კანცლერმა ოლაფ შოლცმა განაცხადა, რომ გერმანია "ძალიან მნიშვნელოვანი საიდუმლო ინფორმაციის გავრცელების“ საქმეს იძიებს. გასულ კვირას რუსმა პროპაგანდისტმა მარგარიტა სიმონიანმა გამოაქვეყნა აუდიოჩანაწერი, სადაც მისი ინფორმაციით, ისმის, როგორ განიხილავენ გერმანიის სამხედრო-საჰაერო ძალების გენერალი და რამდენიმე ოფიცერი ე.წ. ყირიმის ხიდზე Taurus-ებით დარტყმას.
- "რა ინფორმაციაც ვრცელდება, ძალიან სერიოზული საკითხია, ამიტომ მიმდინარეობს გულმოდგინე, ინტენსიური და სწრაფი გამოძიება“, - განაცხადა გასულ შაბათს კანცლერმა.
მოგვიანებით, გერმანიის თავდაცვის სამინისტროს წარმომადგენელმა განაცხადა, რომ ქვეყნის სამხედრო წარმომადგენლების საიდუმლო თათბირი "ნამდვილად ისმინებოდა".
"ჩვენი შეფასებით, სამხედრო საჰაერო ძალების თათბირი ისმინებოდა. ჯერ არ შეგვიძლია იმის მტკიცება, იყო თუ არა რაიმე ცვლილება აუდიოჩანაწერში და გაშიფრულ ვერსიაში, რომელიც ახლა სოციალურ ქსელებში ვრცელდება“, - განაცხადა გერმანიის თავდაცვის სამინისტროს წარმომადგენელმა, რომლის სიტყვებს AFP ციტირებს.
- რა იყო ნათქვამი გაშიფრულ ჩანაწერში?
სიმონიანის თქმით, ჩანაწერში ისმის გერმანელების 19 თებერვლის თათბირიდან საუბარი. პროპაგანდისტის თქმით, ჩანაწერში ფიგურირებენ გერმანიის სამხედრო საჰაერო ძალების ოპერაციების განყოფილების მეთაური და სწავლების მეთაურობა.
სიმონიანმა ჩანაწერის რუსულ ენაზე თარგმანი გამოაქვეყნა. ამ თარგმანის მიხედვით, ერთ-ერთი მოსაუბრე ამბობს, რომ გერმანიის თავდაცვის მინისტრი, ბორის პისტორიუსი „აპირებს შეიმუშავოს საკითხი, რომლის განხორციელების შემდეგ უკრაინას Taurus-ებს გადასცემენ“ და ამატებს: "არავინ არ იცის, რატომ ბლოკავს ფედერალური კანცლერი რაკეტების გადაცემას“.
- შოლცს ადრე არაერთხელ უთქვამს, რომ უკრაინისთვის შორ მანძილზე მოქმედი რაკეტების გადაცემის წინააღმდეგი იყო, რადგან ამან შეიძლება ქვეყანა რუსეთთან ომში ჩაითრიოს.
29 თებერვალს შოლცმა განაცხადა, რომ არ სურს უკრაინისთვის Taurus-ების გადაცემა, რადგან მათი მოქმედების არეალი საშუალებას იძლევა, სამიზნეებს მოსკოვში დაარტყან.
"Taurus-ის მოქმედების რადიუსი 500კმ-ს აღწევს და თუკი მას არასწორად გამოიყენებენ, კონკრეტულ მიზნებს მოსკოვშიც მიაღწევს“, - განაცხადა კანცლერმა.
- მოპოვებულ ჩანაწერში მხარეები Taurus-ის მიწოდების სხვადასხვა ტექნიკურ ასპექტებს განიხილავენ - მიწოდებიდან დაწყებული, თვითმფრინავებზე განთავსებითა და უკრაინელი სამხედროების მომზადებით დამთავრებული.
ამასთან, მათი აზრით, თუკი მიწოდება განხორციელდება, მათ მიწოდებიდან 8 თვის შემდეგ გამოიყენებენ.
ჩანაწერის მიხედვით, მონაწილეები საუბრობენ შესაძლო სამიზნეებზე, რომლებზეც ამ რაკეტებით მიიტანენ იერიშს.
- "ორი საინტერესო მიზანია - ხიდი აღმოსავლეთით და საბრძოლო მასალის საწყობები. საკმაოდ რთულია ამ ხიდს მისწვდე, მაგრამ Taurus-ს ამის გაკეთება შეუძლია, საწყობების განადგურებაც შეუძლია. ხიდი თავისი სიდიდის გამო, ასაფრენ ბილიკს ჰგავს. ამიტომ არა 10, არამედ შეიძლება 20 რაკეტაც არ ეყოს“.
თუმცა მოსაუბრეების მთავარი კითხვაა, რა გზით შეიძლება დარტყმის სამიზნეები მონიშნონ ისე, რომ პროცესში პირდაპირი ჩართვა არ გამოუვიდეთ.
"ყურადღება უნდა მივაქციოთ იმას, რომ თავიდანვე არ იყოს ფორმულირება, რაც ჩვენ კონფლიქტის მხარედ გვაქცევს“, - ამბობს ერთ-ერთი ოფიცერი.
ოთხშაბათს შოლცმა განაცხადა, რომ ქვეყნები, რომლებიც უკრაინას იარაღს აწვდიან, განსაზღვრავენ ამ იარაღის გამოყენების პირობებს. გერმანიის შემთხვევაში კი გამოდიოდა, რომ სამხედროებს რაკეტების გაშვებაში უნდა მიეღოთ მონაწილეობა. "ჩვენს შემთხვევაში ეს ნიშნავს, რომ მოგვიწევდა მონაწილეობა მიგვეღო. ვფიქრობ, ეს გამორიცხულია“, - განაცხადა კანცლერმა.
- რატომ გავრცელდა საიდუმლო ინფორმაცია ახლა?
Spiegel წერს, რომ გერმანიის თავდაცვის სამინისტროში წუხან, რომ არ არის გამორიცხული, ამ საუბრის დროს, სხვა, შიდა ინფორმაციაც გაჟონილიყო. გაზეთის მიხედვით, ოფიცრების საუბარი არადაცული ხაზით, არადაშიფრულ პლათფორმა WebEx-ზე მიმდინარეობდა.
ექსპერტები ვარაუდობენ, რომ ჩანაწერის გამოქვეყნება შემთხვევითი არ ყოფილა.
"გასულ კვირას კანცლერმა უკრაინისთვის Taurus-ების გადაცემა გამორიცხა. ექსპერტების თქმით, რუსეთს სურს, რომ ამ გადაწყვეტილებას კანცლერმა მწვანე შუქი არ აუნთოს“, - ციტირებს DW თავდაცვის ექსპერტს მარი-აგნეს შტარკ-ციმერმანს.
ფრთოსანი Taurus-ი "ჰაერი-ხმელეთის“ კლასის რაკეტაა, რომელსაც შვედურ-გერმანული კომპანია Taurus Systems აწარმოებს. მისი მოქმედების არეალი 500-კმ-მდეა. როგორც Deutsche Welle-ს რუსული სამსახური წერს, ჩანაწერის გაჟონვამ გერმანელ პოლიტიკოსებში მრისხანე რეაქცია გამოიწვია, რომლებსაც ახლა საიდუმლო ინფორმაციის უსაფრთხოებასთან კითხვები აქვთ.
"დარწმუნებულები ვართ, სხვა საუბრების მოსმენაც მიმდინარეობდა, შესაძლოა, უფრო გვიან, რუსეთის ინტერესებიდან გამომდინარე, ისინიც გავრცელდეს“, - ამბობს როდერიხ კიზევეტტერი, რომელიც თავდაცვის საკითხებში ექსპერტია.
- ავტორი: ანრი კურტანიძე