"განადგურებული ვარ" - არსებული ინფორმაციით, ნარკოდანაშაულისთვის აჭარის კულტურის სამინისტროს თანამშრომლის ქალიშვილი დააკავეს: რას წერს თამარ გუდავა?
აჭარის განათლების, კულტურისა და სპორტის სამინისტროში კულტურის დეპარტამენტის უფროსი თამარ გუდავა თანამდებობას ტოვებს.
- გავრცელებული ინფორმაციით, თამარ გუდავას ქალიშვილი ნარკოტიკების რეალიზაციის ბრალდებით დააკავეს.
მან განაცხადა, რომ გამოძიების დასრულებამდე სამინისტროში დაკავებული პოზიციიდან მიდის.
"მეგობრებო, ვარ მთლიანად განადგურებული! პირველ რიგში იმიტომ, რომ მე თავად არ ვიცი რა უბედურება ხდება ჩემს თავს! მეც ახლა ვარკვევ სიტუაციას. მინდა იცოდეთ, რომ თუ დადასტურდა ინფორმაცია ჩემი უფროსი შვილის რაიმე სახის ბრალეულობაზე, ის აუცილებლად აგებს მკაცრად პასუხს კანონის წინაშე! ყველანაირი უხერხულობის თავიდან ასაცილებლად ვწერ განცხადებას და მივდივარ კულტურის დეპარტამენტის უფროსის პოზიციიდან" - აცხადებს თამარ გუდავა.
- საქმე ეხება ფაქტს, რომელზეც დღეს პროკურატურამ განცხადება გაავრცელა. კერძოდ, ორმა პირმა ნარკოტიკი გასაღების მიზნით კონკრეტულ ლოკაციაზე მოათავსეს, შემდეგ კი თავად მოიხმარეს, რა დროსაც ერთ-ერთი მათგანი ზედოზირებით დაიღუპა.
"შინაგან საქმეთა სამინისტროს მიერ ჩატარებული გამოძიებით დადგინდა, რომ 1 მარტს, ორმა პირმა, შემდგომში გასაღების მიზნით, პოლიეთილენის პაკეტებში დაფასოებული დიდი ოდენობით ნარკოტიკული საშუალება მეთადონი (ფუძე) სამტრედიის მუნიციპალიტეტის ერთ-ერთ სოფელში მიიტანეს და მდინარის პირას ე.წ. "ლოკაციებზე" განათავსეს.
გამოძიების თანახმად, მათ ტელეფონის ფოტოკამერით, ადგილმდებარეობის კოორდინატების მითითებით, თითოეულ ლოკაციას ფოტოსურათი გადაუღეს, რათა შემდგომში ისინი ნარკოტიკული საშუალებების შემძენი პირებისთვის გადაეგზავნათ.
- გამოძიების მიერ ამ დროისთვის მოპოვებული ინფორმაციით, აღნიშნულის შემდგომ ორივე პირმა მოიხმარა ნარკოტიკული საშუალება, რის შემდგომაც ერთ-ერთი მათგანი სავარაუდოდ, ნარკოტიკების ზედოზირებით გარდაიცვალა.
"სამართალდამცველებმა ბრალდებული 2 მარტს დააკავეს. მას ბრალდება საქართველოს სისხლის სამართლის კოდექსის 19, 260-ე მუხლის მეხუთე ნაწილის „ბ“ ქვეპუნქტით და მეშვიდე ნაწილის „ა“ ქვეპუნქტით (განსაკუთრებით დიდი ოდენობით ნარკოტიკული საშუალების ჯგუფურად გასაღების მცდელობის ფაქტი) წარედგინა, რაც სასჯელის სახედ და ზომად თოთხმეტიდან ოც წლამდე ან უვადო თავისუფლების აღკვეთას ითვალისწინებს. პროკურატურის შუამდგომლობის საფუძველზე, სასამართლომ ბრალდებულს აღკვეთის ღონისძიების სახით პატიმრობა უკვე შეუფარდა" - ნათქვამია პროკურატურის ინფორმაციაში.
წაიკითხეთ ასევე: