იაპონიაში ეჭვობენ, რომ 2 ადამიანის გარდაცვალების და 100-ზე მეტის ჰოსპიტალიზაციის მიზეზი ერთ-ერთი საკვები დანამატი გახდა

საინფორმაციო სააგენტო Kyodo-ს ცნობით, იაპონიაში წარმოებული დიეტური საკვები დანამატი უკან გაიწვიეს, რადგან ეჭვობენ, რომ შესაძლოა, ის ორი ადამიანის გარდაცვალებასა და 100-ზე მეტი ადამიანის ჰოსპიტალიზაციის მიზეზი იყოს. Kobayashi Pharmaceutical-მა, რომელიც ურეცეპტო წამლებსა და დიეტურ მედიკამენტებს ყიდის, თავისი საკვები დანამატი, რომელიც ქოლესტერინს ამცირებს, მთელი ქვეყნის მასშტაბით უკან გაიწვია.

• Kobayashi Pharmaceutical-ის წარმოებული საკვები დანამატი შეიცავს ინგრედიენტ "წითელი საფუვრის ბრინჯს", იგივე beni koji-ს. Beni koji ბრინჯის ფერმენტაციის შედეგად მზადდება და გავრცელებული აზრით, ის ორგანიზმში ცუდი ქოლესტერინის დონეს უნდა ამცირებდეს.

ოსაკაში დაფუძნებული მედიკამენტების მწარმოებელმა ერთ-ერთი გარდაცვლილის შესახებ განცხადება გააკეთა და დასძინა, რომ დაღუპული beni koji-ს პროექტებს დაახლოებით 3 წლის განმავლობაში რეგულარულად იძენდა და საბოლოოდ, ის თირკმლის დაავადებით გარდაიცვალა.

"ჩვენ ერთი ისეთი შემთხვევის შესახებ უკვე მივიღეთ ინფორმაცია, რომლის გამომწვევ მიზეზთანაც, შესაძლოა, ჩვენი პროდუქტი ყოფილიყო დაკავშირებული. ამჟამად ამ კავშირსა და მომხდარს დეტალურად ვიძიებთ", - განაცხადა მწარმოებელმა კომპანიამ და დასძინა, რომ მომხდარის შესახებ მწუხარებას გამოთქვამს.

Kyodo-ს განცხადების მოსმენის შემდეგ ჯანდაცვის სამინისტროს გარდაცვალების მეორე შემთხვევის შესახებ შეატყობინეს.

პროდუქციის ონლაინ გაყიდვა ჩინეთსა და ტაივანშიც შეჩერებულია.

ანალიზმა დაადგინა, რომ შესაძლოა, პროდუქტები ისეთ ინგრედიენტებს შეიცავდეს, რომელთა დამატებაც მწარმოებლებს არ ჰქონდათ განზრახული.

ბრინჯის ფერმენტაციის პროცესში შესაძლოა, გამოიყოს ტოქსინი, სახელად ციტრინინი, რომელსაც თირკმელების დაზიანება შეუძლია.

წყარო: theguardian

მოამზადა: ანა სიბოშვილმა