"ამ გუნდმა შეძლო ის, რაც ჩვენმა თაობამ ვერ მოახერხა... ალბათ გუშინ არავის ეძინა და ყველა ზეიმობდა" - თემურ ქეცბაია ეროვნულ ნაკრებს ისტორიულ გამარჯვებას ულოცავს
საქართველოს ეროვნული ნაკრების ყოფილი მწვრთნელი თემურ ქეცბაია გუშინდელი მატჩის შესახებ წერს და ნაკრების ფეხბურთელებს ისტორიულ გამარჯვებას ულოცავს.
"უბედნიერესი დღე დაგვიდგა და მიხარია, რომ ამ გუნდმა, ასე ერთიანად, სულით და გულით, ჩვენი დიდი ხნის ოცნება აგვისრულა. მადლობას ვუხდი ყველას, ვინც ამ წარმატებისთვის იშრომა, მადლობა მთელ გუნდს, რომელმაც შეძლო ის, რაც ჩვენმა თაობამ ვერ მოახერხა. ალბათ გუშინ არავის ეძინა და ყველა ზეიმობდა. მინდა, ასეთი ერთიანი და გახარებული საქართველო კიდევ ბევრჯერ ვნახოთ. საქართველო ევროპაზეა" - წერს ქეცბაია.
- ცნობისთვის, გუშინ საქართველოს ეროვნულმა საფეხბურთო ნაკრებმა გუშინ ისტორია დაწერა. ქართველი ფეხბურთელები "ერთა ლიგის" ფინალში საბერძნეთს დაუპირისპირდნენ და 4:2 დაამარცხეს. დაძაბული და თავდაუზოგავი ბრძოლის შედეგად, სანუკვარი ოცნება ახდა და ისტორიაში პირველად, ჩვენი გუნდი ევროპის ჩემპიონატზე იასპარეზებს.
"ევრო 2024“-ზე საქართველოს ეროვნული საფეხბურთო ნაკრები თურქეთის, პორტუგალიისა და ჩეხეთის ნაკრებებს დაუპირისპირდება. როგორც უკვე ცნობილია, "ევრო 2024“ გერმანიაში, 14 ივნისიდან 14 ივლისამდე გაიმართება, ფინალი კი ბერლინის “ოლიმპიაშტადიონზე” შედგება.
რაც შეეხება კონკრეტულად საქართველოს, თურქეთის წინააღმდეგ თამაში 18 ივნისს შედგება, ჩეხეთს 22 ივნისს დაუპირისპირდება, ხოლო პორტუგალიას 26 ივნისს.
წაიკითხეთ ასევე: